کراچی میں بارش سے گرنے والا برگد کا 150 سالہ قدیم درخت بحال
کراچی میں حالیہ بارشوں کے دوران گرنے والے برگد کے ڈیڑھ سو سالہ قدیم درخت کو وزیراعلیٰ سندھ سید مراد علی شاہ کی ہدایت پربحال کردیا گیا ہے، وزیراعلیٰ سندھ مراد علی شاہ نے کہا ہے کہ برگد کے قدیم درخت کی بحالی موسمیاتی حوالے سے اہم پیش رفت ہے۔
ڈان نیوز کے مطابق کراچی میں حالیہ بارشوں میں تیز ہواؤں کے باعث قصر ناز میں برگد کا قدیمی درخت گرگیا تھا، وزیراعلیٰ سندھ کی ہدایت پر 2 دن سے جاری ریسکیو آپریشن کامیابی سے مکمل کرکے درخت کو دوبارہ لگادیا گیا ہے اور 150 سالہ قدیم درخت نے زندگی کا نیا سفر شروع کردیا ہے۔
محکمہ جنگلات سندھ کی رپورٹ کے مطابق درخت کی جڑوں کو فنگس اور دیمک سے نقصان پہنچا تھا، بھاری درخت کو کرین کے ذریعے نزدیکی مقام پر منتقل کیا گیا، ریسکیو آپریشن میں نیم اور کامنی کے درخت بھی محفوظ کرکے دوبارہ نزدیکی مقامات پر لگائے گئے۔
وزیر اعلی سندھ مراد علی شاہ نے نوجوانوں کو پیغام دیا کہ تاریخی درختوں کی اہمیت اور ان کی حفاظت کے لیے کوشاں رہیں۔