خیبرپختونخوا حکومت کا سوات اور ڈیرہ اسمٰعیل خان میں نئے اضلاع بنانے کا فیصلہ
خیبرپختونخوا حکومت نے سوات اور ڈیرہ اسمٰعیل خان کو تقسیم کرکے 2 نئے اضلاع بنانے کا فیصلہ کرلیا، وزیراعلیٰ علی امین گنڈا پور کی ہدایت پر محکمہ ریونیو نے کمشنرز اور ڈی سیز کو مراسلے جاری کردیے۔
ڈان نیوز کے مطابق خیبرپختونخوا حکومت نے سوات کو 2 حصوں بالائی اور زیریں سوات میں تقسیم کرکے نیا ضلع بنانے کا فیصلہ کیا ہے۔
وزیراعلیٰ علی امین گنڈاپور کی ہدایت پر محکمہ ریونیو نے کمشنر ملاکنڈ اور ڈی سی سوات کو مراسلہ ارسال کردیا۔
مراسلے میں کہا گیا ہے کہ وزاعلیٰ علی امین گنڈاپور نے سوات کو تقسیم کرکے ضلع بالائی سوات اور ضلع زیریں بنانے کی ہدایت کی ہے۔
مراسلے میں کمشنر اور ڈی سی کو 3 دن کو اندر اندر رپورٹ جمع کرانے کی ہدایت کی گئی ہے۔ مراسلے کے مطابق بالائی سوات کے نام سے نیا ضلع قائم کیا جائے گا جبکہ موجودہ حصہ زیریں سوات کہلائے گا۔
دوسری جانب ڈیرہ اسمٰعیل خان میں بھی ایک نیا ضلع بنانے کا فیصلہ کیا گیا ہے، وزیر اعلیٰ علی امین گنڈاپور کی ہدایت پر محکمہ ریونیو نے کمشنر اور ڈپٹی کمشنر کو مراسلہ جاری کردیا۔
مراسلے میں کہا گیا ہےکہ ڈیرہ اسمٰعیل خان کو 2 حصوں میں میں تقسیم کرکے نیا ضلع پہاڑ پور بنانے کا فیصلہ کیا گیا ہے، کمشنر اورڈپٹی کمشنر ڈی آئی خان 3 دن کے اندر اندر رپورٹ جمع کروائیں۔