حکومت اور یوٹیلٹی اسٹورز ملازمین کے درمیان معاملات طے پاگئے
حکومت اور یوٹیلٹی اسٹورز ملازمین کے درمیان معاملات طے پاگئے، حکومت نے یوٹیلٹی اسٹورز ملازمین کے لیے 28 ارب روپے کے پیکیج کی منظوری دے دی۔
ڈان نیوز کے مطابق حکومت نے آج سے ملک بھر میں یوٹیلٹی اسٹورز بند کرنے کا اعلان کردیا۔
وفاقی وزیر پارلیمانی امور طارق فضل چوہدری نے اسلام آباد میں پریس کانفرنس کے دوران بتایا کہ یوٹیلٹی کارپویشن کا ملکی معشیت میں اہم کردار رہا ہے جس کا خسارہ کم کرنے کی بھرپور کوشش کی گئی۔
ان کا کہنا تھا کہ تمام تر کوششوں کے باوجود خسارہ کم نہ ہونے کی صورت میں یوٹیلٹی اسٹورز کارپویشن کو بند کرنے کا اعلان کیا گیا، وزیر اعظم شہباز شریف کی ہدایت کے مطابق آج 31 اگست کو یوٹیلیٹی اسٹورز بند کیے جارہے ہیں۔
وفاقی وزیر کا کہنا تھا کہ یوٹیلٹی اسٹورز کے ملازمین کی تعداد 11 ہزار 614 ہے جن کے لیے متفقہ پیکج تیار کیا گیا ہے جب کہ وزیراعظم نے ملازمین کےلیے 28 ارب روپے کے پیکیج کی منظوری دے دی۔
وزیر پارلیمانی امور نے کہا کہ ملک بھرمیں یوٹیلٹی اسٹورزکے اثاثوں کو نیلام کیاجائے گا،یوٹیلیٹی اسٹورز کے ملازمین کے حقوق کا تحفظ یقینی بنایاگیا ہے، یوٹیلیٹی اسٹورز کے کنٹریکٹ ملازمین کو بھی پیکج دیا جارہا ہے۔