اسلام آباد: قومی اسمبلی کے یکم ستمبر کو شیڈول اجلاس کا ایجنڈا جاری
قومی اسمبلی کے یکم ستمبر کو شیڈول اجلاس کا 9 نکاتی ایجنڈا جاری کر دیا گیا۔
ڈان نیوز کے مطابق قومی اسمبلی کا اجلاس بروز پیر (یکم ستمبر) شام 5 بجے شروع ہو گا، جاری کردہ ایجنڈے میں بتایا گیا کہ اسمبلی اجلاس کے دوران اسلام آباد کے سیکٹر جی-13 میں فلیٹس کی تاخیر سےحوالگی پر توجہ دلاؤ نوٹس پیش کیا جائےگا۔
وفاقی وزیرِ خزانہ سینیٹر محمد اورنگزیب ورچوئل اسمبلی آرڈیننس 2025 قومی اسمبلی میں پیش کریں گے، جب کہ کاروباری قوانین میں اصلاحات سے متعلق بل بھی ایجنڈے میں شامل ہے۔
اس کے علاوہ ریگولیٹری ریکوائرمنٹس ختم کرنے اور آسان کاروبار بل 2025 بھی منظوری کے لیے پیش کیا جائے گا ساتھ ہی صدر مملکت آصف علی زرداری کے پارلیمانی خطاب پر شکریہ کی تحریک بھی ایجنڈے کا حصہ ہے۔
قومی اسمبلی کے شیڈول اجلاس میں سیلاب سے متعلق قبل از وقت اقدامات اور بروقت امدادی سرگرمیوں کی کمی پر بحث کی جائےگی، اہم اجلاس میں حالیہ سیلاب کے دوران نیشنل ڈیزاسٹر مینجمنٹ اتھارٹی (این ڈی ایم اے) کی کارکردگی بھی زیر بحث آئے گی۔
مزید بتایا گیا کہ سیلاب متاثرین کو فوری مدد نہ ملنے پر عوامی حلقوں میں تشویش پر بھی اسمبلی اجلاس میں بحث کی جائےگی۔