سیاحت کے فروغ کیلئے ٹورازم اسکل اینڈ انویسٹمنٹ ایکسپو کے انعقاد کا اعلان
پاکستان میں سیاحتی صنعت کے فروغ کے لیے ٹورازم اسکل اینڈ انویسٹمنٹ ایکسپو 2025 اسلام میں آباد میں 10 تا 12 اکتوبر کو منعقد ہوگی۔
حکومت نے بڑے پیمانے پر سیاحتی صنعت کو فروغ دینے کا فیصلہ کرلیا، اس سلسلے میں وزارت بین الصوبائی رابطہ کے تحت وفاقی دارالحکومت میں 10 تا 12 اکتوبر ٹورازم اسکل اینڈ انویسٹمنٹ ایکسپو 2025 کے انعقاد کا اعلان کیا ہے۔
وزارت بین الصوبائی رابطہ حکام کے مطابق نمائش کا انعقاد ایکسپو جناح کنونشن سینٹر اسلام آباد میں کیا جائے گا۔
وزیراعظم شہباز شریف کی جانب سے نمائش کے افتتاح کی توقع ہے، ملکی و غیر ملکی سرمایہ کاروں اور اسٹیک ہولڈرز کی بڑی تعداد ایکسپو میں شرکت کرے گی، ایکسپو میں سیاحت، سرمایہ کاری اور نوجوانوں کی اسکلز پر فوکس کیا جائے گا۔
ایکسپو کا مقصد پاکستان کو عالمی سطح پر سیاحتی مرکز کے طور پر متعارف کرانا ہے، ایکسپو میں سیاحت کے فروغ اور سرمایہ کاری کے مواقع پر خصوصی سیشنز ہوں گے اور سیاحت پر بڑی کانفرنس کا انعقاد کیا جائے گا جس میں سرمایہ کاری اور پبلک پرائیویٹ پارٹنرشپ پر توجہ دی جائے گی۔
سیاحتی نمائش میں ٹریول، ٹور آپریٹرز اور مہمان نوازی سے متعلق اسٹالز لگائے جائیں گے اور پاکستان کے سیاحتی پوٹینشل کو اجاگر کرنے کے لیے خصوصی بریفنگ دی جائے گی۔
نوجوانوں کی اسکلز پر مبنی مختلف مقابلے ایکسپو کا حصہ ہوں گے، نمائش میں کلنری مقابلے بھی ہوں گے جہاں نوجوان شیفس کو اپنی صلاحیتیں دکھانے کا موقع ملے گا، ۔
نمائش کے دوران ملک بھر سے کلچرل پرفارمنس توجہ کا مرکز ہوں گی، نمائش میں ایڈونچر ٹورازم اور ثقافتی ورثے سے متعلق خصوصی ایونٹس کا اہتمام کیا جائے گا۔