کراچی: بینک سے نکلنے والے شہریوں کو لوٹنے والے گروہ کے 2 کارندے گرفتار
کراچی میں اسپیشلائزڈ انویسٹی گیشن یونٹ (سی آئی اے) پولیس نے کارروائی کرتے ہوئے بینک سے رقم لیکر نکلنے والے شہریوں کو لوٹنے والے گروہ کے 2 کارندوں کو گرفتار کرلیا۔
ڈان نیوز کے مطابق ملزمان کی گرفتاری سی آئی اے پولیس کے جمشید کوارٹر کے علاقے میں چھاپے کے دوران ہوئی۔
پولیس نے بتایا ہے کہ گرفتار ملزمان میں شہزاد اور ہدایت اللہ شامل ہیں جن کے قبضے سے 3 پستول، 7 موبائل فون اور موٹر سائیکل برآمد کرلی گئی جب کہ ملزمان کے دیگر ساتھیوں کی گرفتاری کے لیئے چھاپے مارے جارہے ہیں۔
پولیس کے مطابق ملزمان کا گروہ دکانوں پر بھی ڈکیتی کی وارداتوں میں ملوث نکلا ، ملزمان نے کچھ روز قبل شاہ لطیف کے علاقے میں بیکری پر واردات کی تھی اور واردات کی سی سی ٹی وی فوٹیج بھی منظر عام پر آئی تھی۔
پولیس نے مزید بتایا کہ گرفتار سرغنہ ملزم شہباز سے درجنوں لوٹ مار کی وارداتوں کا انکشاف ہوا، ملزم شہباز نے رواں سال ناظم آباد کے علاقے گول بلڈنگ پر مصالحے والے کو لوٹا تھا۔
علاوہ ازیں، ملزم نے رواں سال طارق روڈ پر بینک سے رقم لیکر نکلنے والے شہری سے 12 لاکھ روپے لوٹے تھے جب کہ 2024 میں نیپا پل پر بینک سے رقم لےکر نکلنے والے شہری کو بھی لوٹ مار کا نشانہ بنایا تھا۔
اسی طرح، ملزم نے 2024 میں سہراب گوٹھ پر ایک بیکری پر 14 لاکھ روپے کی واردات کی تھی، گلشن اقبال کے علاقے ڈسکو موڑ پر بھی بیکری پر ڈکیتی کی واردات کی تھی جہاں ملزمان بیکری سے 12 لاکھ روپے کی رقم لوٹ کر باآسانی فرار ہوگئے تھے۔