حکومت پنجاب نے سیلاب متاثرین کو ایئرلفٹ کرنے والا ڈرون حاصل کرلیا
پاکستان نے ریسکیو اینڈ ریلیف آپریشنز کے لیے اہم سنگ میل عبور کرلیا، حکومت پنجاب نے سیلاب متاثرین کے لیے ایئر لفٹ ڈرون حاصل کر لیا، جدید ڈرون 200 کلو تک وزنی شخص کو اٹھا کر محفوظ مقام تک منتقل کرنے کی صلاحیت کا حامل ہے۔
ڈان نیوز کے مطابق سیکریٹری داخلہ پنجاب نے سیلاب متاثرین کو ریسکیو کرنے کے لیے جدید ایئرلفٹ ڈرون ملتان بھجوانے کی ہدایت کردی۔
جنوبی پنجاب بھجوانے سے قبل لاہور میں سول ڈیفنس نے ڈرون کی ٹیسٹ فلائٹس مکمل کیں۔
سیکریٹری داخلہ نے بتایا کہ سول ڈیفنس کے لیے مزید 10 ایئرلفٹ ڈرونز کی خریداری کا فیصلہ کیا گیا ہے، پاکستان میں یہ اپنی طرز کی پہلی ایمرجنسی ایئرلفٹ ڈرون سروس ہے۔
سیکریٹری داخلہ پنجاب نے کہا کہ محکمہ داخلہ ’پنجاب سول ڈیفنس ریزیلئنس کور‘ کو جدید خطوط پر استوار کر رہا ہے، ڈرون سروس سے ناقابل رسائی اور خطرناک مقامات سے انسانوں کو محفوظ انداز میں ایئرلفٹ کیا جاسکتا ہے۔
سیکریٹری داخلہ نے بتایا کہ سیلاب و ہنگامی صورتحال میں سول ڈیفنس کے جوان فرنٹ لائن سولجرز ہیں، سول ڈیفنس کے تربیت یافتہ اہلکار و رضاکار قیمتی انسانی جانیں بچا رہے ہیں۔
انہوں نے کہا کہ سول ڈیفنس ریزیلئنس کور میں شہریوں کی بطور رضاکار رجسٹریشن کا عمل جاری ہے، سیلاب متاثرین کی امداد کے لیے رواں ہفتے 4 ہزار سے زائد رضاکار رجسٹریشن کروا چکے ہیں۔