پشاور میں مبینہ پولیس مقابلہ، 20 سال سے ڈکیتیاں کرنے والے 4 ملزمان ہلاک
خیبرپختونخوا کے دارالحکومت پشاور میں مبینہ پولیس مقابلے کے دوران ڈکیتی کی وارداتوں میں مطلوب انتہائی خطرناک گروہ کے 4 ملزمان ہلاک ہوگئے۔
پشاور کے تھانہ چمکنی کی پولیس اور ڈاکوؤں کے مابین مبینہ مقابلے میں خطرناک ڈکیت گروہ کے 4 ملزمان مارے گئے، پولیس حکام نے دعویٰ کیا ہے کہ ہلاک ہونے والے ملزمان 20 سال سے وارداتیں کر رہے تھے۔
پولیس کا کہنا ہے کہ ہلاک ملزمان اور ان کے ساتھیوں کا گینگ پشاور راولپنڈی، نوشہرہ اور دیگر اضلاع میں 2 دہائیوں سے سرگرم رہے، ملزمان کے دیگر ساتھیوں کی تلاش میں چھاپے مارے جا رہے ہیں
ہلاک ہونے والے ملزمان کی شناخت عبدالغفور، شاہ پور، جاوید اور سمیع اللہ کے ناموں سے ہوئی ہے۔
4 رکنی گینگ حال ہی میں علاقہ جھگڑا میں ایف سی کی وردی ملبوس خود کو سرکاری اہلکار ظاہر کرکے ڈاکٹر کے گھر کروڑوں روپے کی نقدی اور زیورات کی ڈکیتی کرکے فرار ہوا تھا۔
ملزمان سے ایک کلاشنکوف ،ایک عدد رائفل 223 بور ،دو عدد پستول 30 بور ، ایک عدد سیڑھی، 2 عدد موٹر سائیکلیں برآمد کرلی گئیں۔
یاد رہے کہ خیبرپختونخوا کے کئی اضلاع اس وقت شورش سے متاثر ہیں، جہاں آئے روز دہشت گردوں اور جرائم پیشہ افراد کی جانب سے پولیس اور شہریوں پر حملے کیے جاتے ہیں۔
تاہم سیکیورٹی فورسز کی جانب سے کی جانے والی کارروائیوں میں مؤثر جواب دیتے ہوئے دہشت گردوں کا قلع قمع کرنے کا سلسلہ بھی جاری ہے۔