راولپنڈی:بینظیر بھٹو قتل کیس میں سابق صدر جنرل ریٹائرڈ پرویز مشرف کی جائیداد ضبطگی کے خلاف ان کی اہلیہ صہبا مشرف کی دائر کردہ درخواست کی سماعت سترہ نومبر تک ملتوی کردی گئی۔

راولپنڈی کی انسداد دہشتگردی کی خصوصی عدالت نمبر ایک کے جج چوہدری حبیب الرحمان نے پرویز مشرف کی جائیداد ضبطگی کے خلاف صہبا مشرف کی درخواست کی سماعت کی۔

دوران سماعت صہبا مشرف کے وکیل نے عدالت کو بتایا کہ ان کا صہبا مشرف سے رابطہ نہیں ہوسکا لٰہذا ان کی جائیداد کی تفصیلات آج وہ پیش نہیں کر سکیں گے۔

اس پر عدالت نے انہیں تفصیلات پیش کرنے کے لیے مہلت دیتے ہوئے کیس کی سماعت سترہ نومبر تک ملتوی کردی۔

قبل ازیں صہبا مشرف نے بے نظیر قتل کیس میں اپنے شوہر کے اثاثہ جات ضبط کرنے اور بنک اکاؤنٹ منجمند کرنے کے فیصلے کے خلاف ستمبر سن دو ہزار گیارہ میں ایک درخواست  دائر کی تھی جس میں عدالتی فیصلے پر سٹے کی درخواست کی گئی تھی۔

ان کا کہنا تھا کہ ان کے شوہر کو اس کیس میں اشتہاری قرار دینے اور ان کی جائیداد ضبط کرنے کے فیصلے کو واپس لیا جائے اور ضبط شدہ جائیداد درخواست گزار کے حوالے کردی جائے۔