کٹک: جنوبی افریقہ نے دوسرے ٹی ٹوئنٹی میں میزبان انڈیا کو چھ وکٹوں سے شکست دے کر ٹی ٹوئنٹی سیریز اپنے نام کر لی۔

پیر کو کٹک کے بارابتی سٹیڈیم میں کھیلے گئے میچ میں میزبان ٹیم پہلے بیٹنگ کرتے ہوئے 17.1 اوورز میں صرف 92 پر ڈھیر ہو گئی۔

البے مورکل نے 3 انڈین بلے بازوں کو پویلین کی راہ دکھائی۔

ہدف کے تعاقب میں جب جنوبی افریقہ کی آسان فتح صاف دکھائی دینے لگی تو مایوس تماشائیوں نے میدان میں پانی کی بوتلیں پھینکنا شروع کر دیں۔

اس پر کھیل کو ایک گھنٹے کیلئے روکنا پڑا۔ کھیل دوبارہ شروع ہونے کے بعد مہمان ٹیم نے 17.1 اوور میں 4 وکٹوں پر ہدف حاصل کر لیا۔

یاد رہے کہ جنوبی افریقہ نے جمعہ کو دھرم شالا میں کھیلے گئے پہلے میچ میں سات وکٹوں سے فتح حاصل کی تھی۔

دونوں ٹیموں کے درمیان سیریز کا آخری مقابلہ جمعرات کو کولکتہ میں شیڈول ہے۔

دس ہفتوں پر مشتمل دورے میں جنوبی افریقہ اور انڈیا کے درمیان پانچ ون ڈے اور چار ٹیسٹ میچ بھی کھیلے جائیں گے۔