نئی دہلی: ہندوستان نے ہفتے کے روز پاکستان پیپلز پارٹی کے چیئرمین بلاول بھٹو کے کشمیر سے متعلق بیان کو ’حقیقت سے بہت دور‘ قرار دیا۔

پچیس سالہ بلاول بھٹو نے جمعے کو ملتان میں اپنے ایک بیان میں کہا تھا کہ ان کی پارٹی پورے کشمیر کو واپس حاصل کرے گی کیوں کہ دیگر صوبوں کی طرح یہ بھی پاکستان کا حصہ ہے۔

پریس ٹرسٹ آف انڈیا کے مطابق نئی دہلی نے ملک کی سالمیت اور اتحاد کی بات پر زور دیتے ہوئے کہا کہ اس پر کوئی سمجھوتہ نہیں ہوسکتا۔

ہندوستان وزارت خارجہ کے ترجمان سید اکبر الدین نے کہا کہ ہم آگے دیکھنا چاہتے ہیں تاہم اس کا یہ مطلب نہیں کہ ہماری سرحدوں میں کوئی تبدیلی آنے والی ہے۔ ہم واضح کرچکے ہیں کہ ہندوستان کے اتحاد اور سالمیت پر کوئی سمجھوتہ نہیں ہوسکتا۔

انہوں نے کہا کہ ایسے بیانات حقیقت سے بہت دور ہیں اور ہمیں پچھلی صدی میں دھکیل دیتے ہیں۔

بلاول نے کہا: میں پورا کشمیر واپس حاصل کروں گا اور اس کا ایک بھی انچ نہیں چھوڑوں گا کیوں کہ دیگر صوبوں کی طرح یہ بھی پاکستان کا حصہ ہے۔

اس بیان کے موقع پر سابق وزیراعظم راجہ پرویز اشرف اور یوسف رضا گیلانی بھی ان کے ہمراہ موجود تھے۔