کراچی کی سڑکوں پر موجود دیواروں پر نفرت انگیز نعرے اور جملے اکثر دیکھنے کو ملتے ہیں لیکن جو دیکھنے کو نہیں ملتا وہ ہے خوبصورت پینٹنگز کا نظارہ ہے۔

حال ہی میں کراچی کی ایم ٹی خان روڈ اور ایم اے جناح روڈ پر طالبعلموں کے ایک گروپ نے دیواروں سے نفرت انگیز جملے مٹا کر خوبصورت پینٹنگز بنا ڈالی جنہیں دیکھ کر کوئی نہیں کہ سکتا کہ یہ خوبصورت نہیں ہیں۔

انڈس ویلی اسکول کی طالب علم ویرا رستم جی کا کہنا تھا کہ اب وقت آگیا ہے کہ کراچی کی دیواروں کو آلودگی سے پاک کیا جائے اور انہیں خوبصورتی سے سجایا جائے۔

ویرا کا مزید کہنا تھا کہ آدھی سے زیادہ دیواریں کچرے اور گندگی سے بھری رہتی ہیں اور باقی سیاسی یا مذہبی اشتہارات میں ڈوب جاتی ہیں اور اب وقت آگیا ہے کہ ہم کراچی کو ایک نئی زندگی دیں اور ان دیواروں کو رنگیں۔

آئی ایم کراچی نامی مہم کے تحت انڈس ویلی اسکول کی فائن آرٹس ڈیپارٹمنٹ کی سربراہ عدیلہ سلیمان اس پروجیکٹ کی قیادت کر رہی ہیں۔

عدیلہ کا کہنا تھا کہ منورعلی سید سٹینسل آرٹ پروجیکٹ پر کام کر رہے ہیں جس میں ان کے ساتھ 15 فنکار کام کر رہے ہیں۔ انہوں نے مزید بتایا کہ اب تک حسن اسکوائر، سوک سینٹر، صدر، شاہراہ قائدین، ایم ٹی خان روڈ، ائیر پورٹ پر اسٹینسل آرٹ کیا جاچکا ہے۔

اس پروجیکٹ میں صرف یونیورسٹی کے ہی بہیں بلکہ اسکول کے طلبہ بھی شامل ہیں۔

بچوں سے تبدیلی نامی پروجیکٹ پر یونیورسٹی طلبہ کے ساتھ ساتھ اسکول کے بچے بھی کام کر رہے ہیں اور ایم ٹی خان روڈ کو رنگنے کے کام میں مدد بھی کر رہے ہیں۔

اب تک 1000 کے قریب دیواروں پر پینٹ کیا جاچکا ہے اور کسی بھی دیوار کو دوبارہ خراب کرنے کی کوشش نہیں کی گئی کیوں کہ پینٹ ہونے والی دیوار پر دوبارہ پینٹ کرنا مشکل ہوتا ہے۔