ہندوستانی فوج کی فائرنگ سے 2 خواتین زخمی
کوٹلی: پاکستان کے زیر انتظام کشمیر کے نکیال سیکٹر پر ہندوستان کی سیکیورٹی فورسز کی بلا اشتعال فائرنگ اور گولہ باری سے 2 خواتین زخمی ہوگئیں
ڈان نیوز کے نمائندے ابرار حیدر کے مطابق کشمیر میں لائن آف کنٹرول (ایل او سی) پر ہندوستانی بارڈر سیکیورٹی فورس (بی ایس ایف) نے 15 اور 16 اگست کی درمیانی سب بلا اشتعال فائرنگ و گولہ باری کا سلسلہ شروع کیا۔
صبح چھ بجے ہندوستانی فورسز کی نکیال سیکٹر پر فائرنگ سے دو خواتین زخمی ہو گئیں۔
ذرائع کے مطابق زخمی خواتین کا تعلق نکیال سیکٹر کے گاؤں گوئی اور بالاکوٹ سے ہے۔
کشمیر کے علاقے کوٹلی میں ہندوستانی فوج کی جانب سے مقامی آبادی کو نشانہ بنایا جا رہا ہے۔
نکیال سیکٹر میں کی جانب والی بلا اشتعال شیلنگ سے متعدد گھروں کو بھی نقصان پہنچا۔
فائرنگ اور گولہ باری سے ہزاروں افراد گھروں میں محصور ہوگئے جبکہ زخمی خواتین کو بھی اسپتال نہیں پہنچایا جا سکا۔
خیال رہے کہ لائن آف کنٹرول سے ملحقہ علاقوں میں ٹریفک کی روانی بھی معطل ہے۔
پاک فوج کی جانب سے ہندوستانی فورسز کی شیلنگ کے، گزشتہ روز لائن آف کنٹرول پر ہندوستانی فورسز کی فائرنگ سے ایک شخص ہلاک جبکہ چھ زخمی ہوگئے تھے۔
| |
یہ بھی پڑھیں : ایل او سی پر انڈین فائرنگ سے 1 شخص ہلاک
واضح رہے کہ گزشتہ روز کی ہندوستانی فائرنگ سے ایک شخص ہلاک ہوا تھا جبکہ 7 زخمی ہوئے تھے جن میں سے ایک بعد ازاں ہلاک ہو گیا تھا.
ہلاک ہونے والوں میں 75 سالہ محمد شفیع اور 45 سالہ شپال کے نام سے ہوئی جبکہ زخمیوں میں محمد عمران، راشد ، شکیلہ بی بی ، سعید نذیر اور محمد تشہید شامل ہیں.
رواں ماہ کے شروع میں پاکستان نے ایل او سی پر سیز فائر کی خلاف ورزیوں پر ہندوستان کے خلاف سخت احتجاج ریکارڈ کراتے ہوئے فائرنگ میں ایک پاکستانی شہری کی ہلاکت کی شدید مذمت کی تھی۔
ہندوستانی سفیر کو ہدایت کی گئی تھی کہ وہ 2003 کے معاہدے کے تحت سیز فائر کو یقینی بنایا جائے تاکہ ایل او سی سے ملحقہ علاقوں میں امن قائم کیا جاسکے۔
پاک فوج نے اقوام متحدہ کے پاکستان و ہندوستان میں فوجی مبصر گروپ کے سامنے بھی بلااشتعال ہندوستانی فائرنگ پر شدید احتجاج کیا۔
سرکاری ذرائع کا کہنا ہے کہ ہندوستان کی جانب سے ورکنگ باﺅنڈری پر بلااشتعال فائرنگ کا سلسلہ گزشتہ کئی ہفتوں سے جاری ہے۔