لاہور: ایسا لگتا ہے کہ دسمبر میں انڈیا کے ساتھ پرکشش ہوم سیریز منسوخ ہونے کی صورت میں مالی خسارے سے بچنے کیلئے پاکستان کرکٹ بورڈ نے کفایت شعاری مہم شروع کر دی۔

پی سی بی نے قائد اعظم ٹرافی کے کوالی فائنگ راؤنڈ میں ریجنل ٹیموں کی نمائندگی کرنے والے تقریباً 160 کھلاڑیوں کو کٹس نہ فراہم کرنے کا فیصلہ کیا ہے۔

17 ستمبر سے ملک بھر میں شروع ہونے والے کوالی فائنگ راؤنڈ میں شریک ٹیموں میں بہاولپور، لاہور بلیوز، سیالکوٹ، ملتان، کراچی بلیوز، فیصل آباد، فاٹا اور ایبٹ آباد شامل ہیں۔

ڈان کو معلوم ہوا ہے کہ پی سی بی نے ریجنل باڈیز کو اپنے فیصلے سے آگاہ کر دیا ہے اور چونکہ بورڈ نے ابھی تک ریجنز کیلئے سپانسر فراہم کرنے کا پروگرام فائنل نہیں کیا لہذا ریجنل باڈیز کو کٹس خریدنے کیلئے فنڈز جمع کرنے میں مشکلات کا سامنا ہو سکتا ہے۔

تاہم، پی سی بی قائد اعظم ٹرافی کے فائنل راؤنڈ اور راولپنڈی میں یکم ستمبر سے شروع ہونے والے قومی ٹی ٹوئنٹی کپ کیلئے کٹس فراہم کرے گا۔

قابل ذکر بات یہ ہے کہ پی سی بی کی ریجنل باڈیز کیلئے سپانسر شپ حاصل کرنے کی پہلی کوشش ناکام رہی ہے کیونکہ کوئی بھی سپانسر بولی میں بورڈ کی طے شدہ کم سے کم قیمت دو کروڑ دینے کو تیار نظر نہیں آیا۔

تاہم، اطلاعات ہیں کہ مختلف سپانسرز کے ساتھ مذاکرات جاری ہیں اور اس ضمن میں کراچی ریجن کو ایک مقامی سپانسر سے اچھی پیشکش ملی ہے۔

ڈان کو معلوم ہوا ہے کہ پی سی بی انڈیا کے ساتھ یواے ای سیریز سے پانچ کروڑ ڈالرز آمدنی کی توقع کر رہا ہے۔

تاہم،اب تک انڈین حکومت کا ردعمل کوئی مثبت نہیں رہا کیونکہ نئی دہلی نے سیاسی کشیدگی کو پیش نظر رکھتے ہوئے بی سی سی آئی کو پاکستان کے ساتھ سیریز کھیلنے کی ہری جھنڈی نہیں دکھائی۔

ذرائع نے ڈان کو بتایا کہ سیریز کے امکانات تیزی سے معدوم ہوتے دکھائی دیتے ہیں اور ایسے میں پی سی بی کیلئے مالی طور پر زندہ رہنے کیلئے کفایت شعاری کے علاوہ کوئی راستہ نہیں بچا۔

ذرائع بتاتے ہیں کہ اس مہم میں عملہ کی ڈاؤن سائزنگ وغیرہ بھی شامل ہے۔

ادھر ، پی سی بی سے ریجنل ٹیموں کو کٹس نہ فراہم کرنے کے حوالے سے رابطہ کرنے کی کوشش کی گئی تو کوئی جواب موصول نہیں ہوا۔