دماتورو: نائجیریا میں دو خاتون خودکش بمباروں نے ایک مسجد کو ہدف بنایا جس کے نتیجے میں 15 افراد ہلاک ہوگئے۔

تفصیلات کے مطابق واقعے میں دو خودکش بمبار جبکہ 13 نمازی بھی جاں بحق ہوئے.

ایک دوسرے حملے کے حوالے سے ملکی فوج نے بتایا کہ بوکو حرام کے شدت پسندوں نے رات کو ریاست یوب کے ایک فوجی کیمپ پر حملہ کیا تاہم اسے پسپا کردیا گیا اور جوابی کارروائی میں 100 حملہ آور مارے گئے۔

خبر رساں ادارے اے پی کے مطابق فوجی ترجمان کرنل سانی عثمان نے کہا کہ گونیری کے گاؤں میں ہونے والی اس لڑائی میں سات فوجی بھی مارے گئے جبکہ نو زخمی ہوئے۔

کچھ گھنٹے بعد مقامی وقت صبح ساڑھے چھ بجے کے قریب خودکش حملہ آوروں نے فجر کی نماز کے دوران مسجد کو ہدف بنایا۔

ایک رہائشی ابراہیم موسیٰ نے بتایا کہ ایک خودکش حملہ آور نے مسجد میں داخل ہوتے ہی خود کو دھماکے سے اڑالیا جبکہ دوسری سے جب بوچھ گچھ کی گئی تو اس نے بھی خود کو اڑالیا۔

انہوں نے بتایا کہ انہوں نے 15 لاشیں گنی تھیں جبکہ 12 دیگر افراد کو دماتورو کے ہسپتال منتقل کردیا گیا۔