اسلام آباد: پاکستان پیپلز پارٹی (پی پی پی) کے رہنما قمر زمان کائرہ نے کہا ہے کہ پاناما لیکس میں جتنے نام آئے ہیں سب کا احتساب ہوگا لیکن آغاز وزیراعظم نواز شریف سے ہو۔
اسلام آباد میں معاملے پر حزب اختلاف کی نو جماعتوں کے اجلاس کے بعد پاکستان تحریک انصاف(پی ٹی آئی) شاہ محمود قریشی اور عوامی مسلم لیگ کے سربراہ شیخ رشید کے ہمراہ میڈیا سے گفتگو میں پی پی پی رہنما کا کہنا تھا کہ وزیراعظم پانامالیکس سامنے آنے کے بعد ذمہ داریاں پوری کرنے میں ناکام رہے ہیں۔
پاناما لیکس میں جتنے نام آئے ہیں سب کا احتساب ہوگا لیکن آغاز وزیراعظم سے ہو۔
'وزیراعظم ملک کے سربراہ ہیں، چیف ایگزیکیٹیو ہیں، لہٰذا ان کی یہ ذمہ داری بنتی ہے۔ ہم نے اپوزیشن کی جماعتوں کے لیے کوئی راستہ نہیں نکالا، ہم نے کہا ہے کہ تمام افراد کا احتساب ہونا چاہیے لیکن اس کا آغاز وزیراعظم سے ہو کیوں کہ وہ ملک کے چیف ایگزیکیٹیو ہیں۔'
انہوں نے کہا کہ حکومتی ٹی او آر موجودہ شکل میں قابل قبول نہیں، کل اپوزیشن کا دوبارہ اجلاس ہوگا جس میں ہر جماعت اپنے ٹی او آرز پیش کرے گی۔