اگر اس وقت فوٹو شیئرنگ ایپس کی بات کی جائے تو مقبولیت کے لحاظ سے پرزما کا مقابلہ کوئی نہیں کرسکے گا جو آپ کی عام تصاویر کو خوبصورت آرٹ ورک میں تبدیل کردیتی ہے اور اچھی خبر یہ ہے کہ اب یہ ایپ آف لائن بھی کام کرسکے گی۔

اس ایپ میں فوٹو فلٹرز کے لیے نیورل نیٹ ورک ٹیکنالوجی استعمال کی جاتی ہے جس کے لیے اب تک انٹرنیٹ کنکشن کی ضرورت تھی، کیونکہ ان فلٹرز کو کام کرنے کے لیے مخصوص سرورز کی ضرورت ہوتی تھی۔

مگر اب پرزما میں نیورل نیٹ ورک ٹیکنالوجی کو مزید بہتر بنایا گیا ہے تاکہ وہ آف لائن بھی زیادہ تیز کام کرسکے۔

کتنا تیز؟ اس کا انحصار آپ کے اسمارٹ فون کی صلاحیت پر ہے، جیسے آئی فون سکس میں اگر پہلے کسی تصویر پر 10 سے 20 سیکنڈز لگتے تھے تو اب یہ کام 3 سیکنڈز میں ہوگا۔

جبکہ اس سے قبل اگر ایپ کے سروز کسی وجہ سے کام کرنے سے قاصر ہوتے تو صارف فوٹو بدلنے کا انتظار ہی کرتا رہ جاتا تھا۔

پرزما کا کہنا ہے کہ آف لائن ایپ کا استعمال صارفین کو زیادہ پسند آئے گا کیونکہ اب نیورل نیٹ ورکس اسمارٹ فونز میں ہی کام کریں گے۔

تاہم کمپنی نے یہ بتانے سے انکار کردیا کہ نیورل ٹیکنالوجی بغیر انٹرنیٹ کے فون پر کس طرح کام کرے گی۔

تاہم اس کا کہنا تھا کہ اب یہ ایپ اسمارٹ فون اسپیڈ کے لیے بھی معیار ثابت ہو گی، مگر یہ ہوگا کس طرح یہ فی الوقت واضح نہیں۔

پرزما کے سی ای او کے مطابق مستقبل قریب میں فوٹو شیئرنگ ایپ میں نایک اسپیشل موڈ کا بھی اضافہ کیا جائے گا۔

اور ہاں فوٹوز کے ساتھ اس ایپ میں ویڈیو سپورٹ بھی جلد متعارف کرائے جانے کا امکان ہے۔