برطانیہ سے تعلق رکھنے والے سائمن بیری نے اپنے بسکٹ کو چائے میں ڈبونے کے لیے اتنی لمبی چھلانگ لگادی کہ ان کا نام گنیز بک آف ورلڈ ریکارڈ میں ہی شامل کرلیا گیا۔

ٹیلی گراف کی ایک رپورٹ کے مطابق لمبی چھلانگ اور بسکٹ کے شوقین 24 سالہ سائمن بیری نے زمین سے 230 فٹ کی اونچائی سے چھلانگ لگا کر اپنے بسکٹ کو چائے میں ڈبویا۔

ان کی چھلانگ لگانے کی ویڈیو دی ہوک نامی پیج نے فیس بک پر شیئر کی، جسے دیکھ کر صارفین نہایت متاثر ہوئے، اس دوران سائمن کے سر پر ایک کیمرا لگایا گیا تھا جس سے اس کرتب کی ویڈیو زیادہ شاندار انداز میں بنائی جاسکے۔

اس ویڈیو کو اب تک 13ملین افراد دیکھ چکے ہیں۔

اپنے اس کرتب کے حوالے سے سائمن بیری کا کہنا تھا کہ 'یہ خاصا مشکل کام تھا، اس کرتب کو مکمل کرنے میں میری ٹیم نے بے حد مدد کی، اپنے بسکٹ کو چائے میں صحیح انداز سے ڈبونا کافی مشکل ٹرک ہے'۔

اپنی خوشی کا اظہار کرتے ہوئے انہوں نے مزید کہا کہ 'یہ میرے لیے ناقابل یقین تھا، سب کو مسکراتے دیکھنا شاندار رہا'۔