’ہر پاکستانی کی طرح پاک فوج بھی پاناما کیس فیصلے کی منتظر‘
راولپنڈی: پاک فوج کے ترجمان میجر جنرل آصف غفور کا کہنا ہے کہ ہر پاکستانی کی طرح پاک فوج بھی پاناما کیس کے انصاف اور میرٹ پر فیصلے کی منتظر ہے۔
پاک فوج کے شعبہ تعلقات عامہ (آئی ایس پی آر) کے مطابق ڈی جی آئی ایس پی آر میجر جنرل آصف غفور نے کہا کہ ’برطانیہ میں پاناما کے سوال پر میرا جواب سیاق و سباق سے ہٹ پیش کیا گیا، جبکہ ہر پاکستانی کی طرح پاک فوج بھی پاناما کیس کے انصاف اور میرٹ پر فیصلے کی منتظر ہے۔‘
یہ بھی پڑھیں: فوجی اتحاد:’راحیل شریف کی تقرری ریاست کا فیصلہ ہے‘
واضح رہے کہ چند روز قبل میڈیا میں خبر رپورٹ ہوئی تھی جس میں کہا گیا تھا کہ پاک فوج پاناما کیس سے متعلق جو بھی فیصلہ ہوا اس کو قبول کرے گی، جبکہ اس سے کوئی فرق نہیں پڑتا کہ فیصلہ کیا آتا ہے۔‘
آرمی چیف ان دنوں برطانیہ کے دورے پر ہیں، جہاں میجر جنرل آصف غفور بھی ان کے ہمراہ ہیں جنہوں نے چند روز قبل وہاں میڈیا کو بریفنگ بھی دی تھی۔
یاد رہے کہ 23 فروری کو سپریم کورٹ میں پاناما لیکس پر درخواستوں کی سماعت مکمل ہوگئی تھی اور جسٹس آصف کھوسہ کی سربراہی میں قائم 5 رکنی لارجر بنچ نے کیس کا فیصلہ محفوظ کرلیا تھا۔
مزید پڑھیں: پاناما کیس کی سماعت مکمل، فیصلہ محفوظ
جسٹس آصف کھوسہ کا کہنا تھا کہ فیصلے کا کوئی شارٹ آرڈر جاری نہیں ہوگا، بلکہ تفصیلی فیصلہ ہی جاری کیا جائے گا۔
ان کا مزید کہنا تھا کہ کیس کا فیصلہ مناسب وقت پر سنایا جائے گا اور 20 سال کے بعد بھی لوگ کہیں گے کہ یہ فیصلہ قانون کے عین مطابق تھا۔