’بھارت کشمیر میں آبادیات کو تبدیل کرنے کی کوشش کر رہا ہے‘
اسلام آباد: مشیر خارجہ سرتاج عزیز نے اقوام متحدہ کے سیکریٹری جنرل انتونیو گویتریس کو خط لکھ کر انہیں بھارت کے زیر انتظام کشمیر میں آبادی کے تناسب کو تبدیل کرنے کی بھارتی کوششوں سے آگاہ کردیا گیا۔
دفتر خارجہ سے جاری بیان کے مطابق سرتاج عزیز کی جانب سے اقوام متحدہ کے سیکریٹری جنرل کو لکھے گئے خط میں بھارت کے زیر انتظام کشمیر میں آبادی کے تناسب میں تبدیلی لانے کی مذموم بھارتی کوششوں سے انہیں آگاہ کیا گیا ہے۔
خط میں کہا گیا ہے کہ کشمیر میں غیر ریاستی باشندوں کو مستقل رہائش کے سرٹیفکیٹ جاری کرنا، بھارتی فوج کے ریٹائرڈ ملازمین کو زمین کی الاٹمنٹ اور غیر کشمیریوں کو زمین الاٹ کیے جانا بھی کشمیر میں آبادی کے تناسب میں تبدیلی کی بھارتی کوششوں کا حصہ ہے۔
یہ بھی پڑھیں: 'پاکستان مذاکرات کے ذریعے مسئلہ کشمیر کے حل کیلئےتیار'
خط کے مطابق کشمیری پنڈتوں اور مغربی پاکستان کے مہاجرین کے لیے کشمیر میں علیحدہ بستیوں کا قیام بھی بھارت کے زیر انتظام کشمیر میں آبادی کے تناسب میں تبدیلی کی کوششوں کا حصہ ہے۔
خط میں مزید کہا گیا ہے کہ بھارت کی ان تمام کوششوں کا مقصد کشمیر کی مسلم اکثریت کو اقلیت میں تبدیل کرنا ہے، تاکہ اقوام متحدہ کی نگرانی میں استصواب رائے میں من پسند نتائج حاصل کیے جاسکیں۔
مشیر خارجہ نے خط کے ذریعے اقوام متحدہ کے سیکریٹری جنرل پر زور دیتے ہوئے کہا کہ اقوام متحدہ کی قراردادوں پر عمل درآمد نہ ہونے سے بھارت کے زیر انتظام کشمیر میں انسانی حقوق کی خلاف ورزیوں میں اضافہ ہوا ہے، جبکہ ان قراردادوں پر عمل کرنے سے ہی ہم لاکھوں کشمیریوں کے مسائل کا خاتمہ اور جنوبی ایشیا میں امن و استحکام قائم کرسکتے ہیں۔