بنگلہ دیش: گارمنٹ فیکٹری میں بوائلر دھماکا، 10 افراد ہلاک
ڈھاکا: بنگلہ دیش کے دارالحکومت ڈھاکا میں ایک گارمنٹ فیکٹری میں بوائلر پھٹنے سے 10 افراد ہلاک اور درجنوں زخمی ہوگئے۔
خبررساں ادارے رائٹرز کے مطابق حادثہ ڈھاکا کے مضافاتی علاقے غازی پور میں واقع کمپنی ملٹی فیبس لمیٹڈ میں پیش آیا، جو سوئیڈن، ڈنمارک، جرمنی، روس، اسپین، نیدر لینڈ اور برطانیہ کو ملبوسات سپلائی کرتی ہے۔
فائر سروس آفیشل پالاش چندرا مودک نے رائٹرز کو بتایا، '9 افراد بوائلر دھماکے میں موقع پر جاں بحق ہوگئے جبکہ ایک شخص نے ہسپتال میں دم توڑا'۔
دوسری جانب کمپنی کا کہنا ہے کہ پلانٹ بالکل درست کام کر رہا تھا، جسے جرمنی سے درآمد کیا گیا تھا۔
واضح رہے کہ عید کے موقع پر کمپنی 10 دن کے لیے بند تھی جہاں منگل (4 جولائی) سے ہی کام کا دوبارہ آغاز کیا گیا تھا۔
مزید پڑھیں: بنگلہ دیش: فیکٹری میں بوائلر دھماکا، 22 افراد ہلاک
کمپنی کے چیئرمین اور مینیجنگ ڈائریکٹر ماحی الدین فاروقی نے رائٹرز کو بتایا کہ 'یہ ایک حادثہ تھا اور ہر چیز ٹھیک تھی'۔
انھوں نے بتایا، 'بوائلر بالکل ٹھیک کام کر رہا تھا، لیکن سروس کے بعد جب ملازمین اسے اسٹارٹ کرنے لگے تو یہ دھماکے سے پھٹ گیا'۔
بنگلہ دیش میں فیکٹریوں میں آگ لگنے کے واقعات سمیت دیگر حادثات بھی ہوتے رہتے ہیں، جن کی بڑی وجہ حفاظتی قوانین پر عمل پیرا نہ ہونا ہے۔
ستمبر 2016 میں بھی ڈھاکا کے نواح میں واقع قصبے ٹونگی کی ایک پیکجنگ فیکٹری میں بوائلر پھٹنے سے لگنے والی آگ کے نتیجے میں 22 افراد جھلس کر ہلاک جبکہ 70 زخمی ہوگئے تھے۔
یہ بھی پڑھیں: بنگلہ دیش: فیکٹری میں آتشزدگی سے سو سے زائد ہلاک
اس سے قبل نومبر 2011 میں ڈھاکا کے نواح میں واقع آشولیا انڈسٹریل ایریا میں واقع ایک 9 منزلہ فیکٹری میں آگ لگنے سے کم از کم 111 ملازمین ہلاک ہوگئے تھے۔
اس کے 6 ماہ بعد کپڑے بنانے والی ایک فیکٹری منہدم ہونے کے نتیجے میں 1 ہزار 138 افراد ہلاک ہوگئے تھے، جبکہ 3 ہزار سے زائد افراد ملبے تلے دب گئے تھے۔