Dawn News Television

شائع 18 اپريل 2018 12:22am

ٹنڈولکر کی گلی کرکٹ کھیلنے کی ویڈیو وائرل ہو گئی

لیجنڈ بھارتی بلے باز سچن ٹنڈولکر کو کرکٹ سے ریٹائر ہوئے کئی سال بیت گئے لیکن کھیل سے ان کی محبت ابھی بھی کم نہ ہوئی اور یہی محبت انہیں بلا تھامے ممبئی کی گلیوں تک کھینچ لائی۔

پیر کو گھر جاتے ہوئے سچن ٹنڈولکر نے ممبئی کے تعمیراتی علاقے میں سڑک پر نوجوانوں کو کرکٹ کھیلتا دیکھا تو گاڑی سے اترکر خود بھی اس میں شامل ہوگئے اور ان کی یہ ویڈیو سوشل میڈیا پر وائرل ہو گئی۔

یہ ویڈیو سابق بھارتی کرکٹر ونود کامبلی نے سوشل میڈیا پر شیئر کی جن کے ساتھ ٹنڈؤلکر نے اسکول کرکٹ میں سب سے بڑی شراکت کا عالمی ریکارڈ بنایا تھا۔

ون ڈے اور ٹیسٹ کرکٹ میں سب سے زیادہ رنز بنانے والے ٹنڈولکر کو ویڈیو میں بیٹ تھامے نوجوان باؤلرز کی باؤلنگ کھیلتے ہوئے دیکھا جا سکتا ہے جہاں انہوں نے پانچوں گیندوں کو واپس باؤلر کی جانب کھیلا۔

کچھ دیر بعد سڑک سے گزرنے والے دیگر افراد کو بھی جب ٹنڈولکر کی موجودگی کا احساس ہوا تو انہوں نے بھی گاڑیاں روک کر یہ منظر دیکھا اور موقع کا فائدہ اٹھاتے ہوئے لٹل ماسٹر کے ساتھ سیلفیاں بھی بنوائیں۔

Read Comments