تھیٹر اداکارہ مہوش فاروقی انتقال کر گئیں
تھیٹراداکارہ،ماہر تعلیم اور زمبیل ڈراماٹک ریڈنگز کی شریک سربراہ مہوش فاروقی طویل علالت کے بعد انتقال کر گئیں۔
مہوش فاروقی نے 7 سال قبل عاصمہ مندروالا اور سیف حسن کے ساتھ مل کر ’زمبیل ڈراماٹک ریڈنگز‘ کو تشکیل دیا تھا، جس کے ذریعے معروف لکھاریوں کے ڈرامے اور افسانے براہ راست پڑھے جاتے ہیں۔
زمبیل ڈراماٹک ریڈنگز کے ذریعے سعادت حسن منٹو، عصمت چغتائی، قرۃ العین حیدر اور فیض احمد فیض سمیت دیگر معروف ادیبوں، افسانہ نگاروں اور شاعروں کی تخلیقات کو پیش کیا جاچکا ہے۔
زمبیل ڈراماٹک کے تحت ہی کراچی لٹریچر فیسٹیول (کے ایل ایف) لاہور بنالے اور فیض انٹرنیشنل فیسٹیول میں بھی ڈرامے اور دیگر تخلیقات پیش کی گئیں۔
2 سال قبل ہی زمبیل ڈراماٹک نے ویڈیو اسٹریمنگ ویب سائٹ یوٹیوب پر ’زمبیل نامہ آف یوٹیوب‘ نامی آڈیو چینل کا آغاز کیا، جس کے ذریعے مختلف تخلیقات کو پیش کیا گیا۔