مقبوضہ کشمیر:بھارتی فوج کی فائرنگ سے بچی سمیت 3 نوجوان جاں بحق
مقبوضہ کشمیر میں حریت رہنما برہان وانی کی دوسری برسی سے قبل بھارتی فورسز کی فائرنگ سے کم سن بچی سمیت 3 نوجوان جاں بحق اور متعدد زخمی ہوگئے جبکہ نماز جنازہ کے بعد ہزاروں افراد نے شدید احتجاج کیا۔
پولیس کی جانب سے جاری بیان میں کہا گیا ہے کہ جنوبی علاقے ریڈوانا میں جب بھارتی فوج گشت کررہی تھی تو مقامی افراد کی جانب سے پتھراؤ کیا گیا جس کے جواب میں فوج نے عوام کو منتشر کرنے کی کوشش کی۔
بیان میں کہا گیا ہے کہ ‘فوج نے مظاہرین کو منتشر کرنے کی کوشش کی جس دوران 5 افراد زخمی ہوئے’۔
یہ بھی پڑھیں:مقبوضہ کشمیر:برہان وانی کی برسی،حریت قائدین گرفتار و نظربند
دوسری جانب مقامی افراد کا کہنا تھا کہ سپاہیوں نے فائرنگ کی، شاٹ گن اور آنسو گیس کا استعمال کیا جس کے نتیجے میں کئی افراد زخمی ہوئے جنھیں ہسپتال منتقل کیا گیا۔
ہسپتال حکام کے مطابق دوران علاج تین افراد دم توڑ گئے۔