عمران اسمٰعیل گورنر سندھ مقرر، نوٹیفیکشن جاری
پاکستان تحریک انصاف (پی ٹی آئی) کے رہنما عمران اسمٰعیل کو سندھ کا 33واں گورنر مقرر کر دیا گیا۔
صدر مملکت ممنون حسین نے وزیراعظم عمران خان کی ایڈوائس پر عمران اسمٰعیل کو گورنر سندھ مقرر کرنے کی منظوری دے دی۔
صدر کی منظوری کے بعد کابینہ ڈویژن نے عمران اسمٰعیل کو گورنر مقرر کرنے کا نوٹی فکیشن جاری کر دیا۔
عمران اسمٰعیل 27 اگست بروز پیر اپنے عہدے کا حلف اٹھائیں گے اور چیف جسٹس سندھ ہائی کورٹ ان سے حلف لیں گے۔
واضح رہے کہ تحریک انصاف نے 11 اگست کو عمران اسمٰعیل کو گورنر سندھ بنانے کا فیصلہ کیا تھا، جس کی باضابطہ منظوری عمران خان نے دی تھی۔
عمران اسمٰعیل نے پارٹی کی جانب سے گورنر سندھ نامزد کیے جانے کے بعد میڈیا سے گفتگو کرتے ہوئے کہا کہ مجھے گورنر کی بہت بڑی ذمہ داری سونپی گئی ہے، تاہم سب جماعتوں کو ساتھ لے کر چلوں گا، میرے لیے شہری اور دیہی علاقے برابر ہیں۔
مزید پڑھیں: گورنر سندھ محمد زبیر نے عہدے سے استعفیٰ دے دیا
انہوں نے کہا کہ حریف جماعتوں سے کہتا ہوں کہ وہ ایک قدم آگے آئیں ہم دس قدم بڑھائیں گے۔
عمران اسمٰعیل نے گورنر کی حیثیت سے وفاق کی نمائندگی اور سندھ کے مسائل کے حل کے لیے پُل کا کردار ادا کرنے کے عزم کا بھی اظہار کیا تھا۔
یاد رہے کہ عمران اسمٰعیل نے حالیہ عام انتخابات میں سندھ اسمبلی کی نشست پی ایس 111 سے کامیابی حاصل کی تھی۔