سام سنگ کے پہلے فولڈ ایبل اسمارٹ فون کی قیمت سامنے آگئی
اگر تو آپ ایسے اسمارٹ فون کو خریدنے کے لیے پرجوش ہیں جو کاغذ کی طرح مڑ سکتا ہو تو بہتر ہے کہ ابھی سے بچت کرنا شروع کردیں۔
جنوبی کورین نیوز ایجنسی کی ایک رپورٹ کے مطابق سام سنگ نے گزشتہ ہفتے ایک ایونٹ میں جس فولڈ ایبل فون کو متعارف کرایا تھا، وہ صارفین کو 1770 ڈالرز (2 لاکھ 37 ہزار پاکستانی روپے سے زائد) میں دستیاب ہوگا۔
یہ قیمت کافی زیادہ ہے، یہاں تک کہ آئی فون ایکس ایس میکس کا 512 جی بی ورژن بھی اس کے مقابلے میں سستا لگتا ہے، جس کی قیمت 1449 ڈالرز ہے۔
مزید پڑھیں : سام سنگ کا فولڈ ایبل فون سامنے آگیا
رپورٹ میں دعویٰ کیا گیا ہے کہ سام سنگ کے اس فون کو گلیکسی ایف کا نام دیا جائے گا جبکہ یہ مارچ 2019 میں فروخت کے لیے پیش کیا جائے گا۔
سام سنگ کے موبائل ڈویژن کے سربراہ ڈی جے کو کچھ عرصے پہلے یہ کہہ چکے ہیں کہ یہ فولڈ ایبل فون 2019 کی پہلی ششماہی میں صارفین کے لیے دستیاب ہوگا۔
گلیکسی ایف سام سنگ کا 7.4 انچ کا فون ہوگا جو فولڈ ہوکر 4.6 انچ کا ہوجائے گا، تاہم اس فون میں فائیو جی سپورٹ نہیں ہوگی۔