رائل رمبل مقابلے کن ریسلرز کے نام رہے؟
ڈبلیو ڈبلیو ای کا سال کا پہلا بڑا ایونٹ کافی دلچسپ ثابت ہوا جس میں ایک خاتون ریسلر بھی مردوں کے رائل رمبل مقابلے کا حصہ بنی تاہم دونوں میچز فیورٹ ریسلرز نے ہی جیت لیے۔
ایریزونا میں ہونے والا ایونٹ یادگار ثابت ہوا جس کے لگ بھگ تمام میچز کافی دلچسپ ثابت ہوئے۔
ہر سال ریسل مینیا کی جانب سفر کا آغاز تیس ریسلرز کے رائل رمبل مقابلے سے ہوتا ہے جس کا فاتح ڈبلیو ڈبلیو ای کے سب سے بڑے ایونٹ میں چیمپئن شپ میچ کا حصہ بنتا ہے۔
مزید پڑھیں : تاریخ ساز رائل رمبل مقابلے کون جیتنے میں کامیاب ہوا؟
ویسے تو اس ایونٹ کے آغاز سے قبل بھی تین میچز ہوئے یعنی پری شو میں، تاہم اصل مقابلے اس کے بعد ہوئے۔
اسمیک ڈاﺅن ویمن چیمپئن شپ
اس مقابلے میں دفاعی چیمپئن آسکا کا مقابلہ لوگوں کی فیورٹ بیکی لنچ سے تھا اور دونوں کے دوران کافی زبردست مقابلہ ہوا جو کہ 18 منٹ تک جاری رہا۔ میچ کے دوران دونوں ریسلر ہی اپنے اچھے داﺅ لگا کر جیتنے کی کوشش کرتی رہیں مگر حیران کن طور پر جاپانی ریسلر نے بیکی لنچ کو شفاف طریقے سے اپنے داﺅ میں پھنسا کر ہار ماننے پر مجبور کردیا۔
گریڈ : A-
اسمیک ڈاﺅن ٹیگ ٹیم چیمپئن شپ
49 سالہ اسمیک ڈاﺅن کمشنر شین میکموہن اور دی میز کی جوڑی کا مقابلہ چیمپئن شیمس اور سیزارو سے تھا اور میچ کے اختتامی لمحات میں شیمس نے حادثتی طور پر اپنے ساتھی کو ہی بروگ کک کا نشانہ بنادیا، جس سے دی میز کو اپنے داﺅ اسکل کرشنگ فنالے لگانے کا موقع مل گیا اور شین میکموہن نے شوٹنگ اسٹار پریس کے ذریعے فتح حاصل کرلی۔
گریڈ : B
را ویمن چیمپئن شپ
اس مقابلے کے بارے میں پہلے ہی کہا جارہا تھا کہ اسے چیمپئن رونڈا راﺅسی اپنے نام کرلیں گی مگر ساشا بینکس نے کافی زبردست مقابلہ کیا، 14 منٹ طویل مقابلے میں دونوں ریسلرز نے ایک دوسرے کو چت کرنے کی ہر ممکن کوشش کی، ایک موقع پر ساشا بینکس نے اپنے داﺅ بینکس اسٹیٹمنٹ میں چیمپئن کو بھی پھنسالیا مگر رونڈا راﺅسی نے اسے ریورس کرکے پیپرز پٹ سلم کے ذریعے حریف کو چت کرکے چیمپئن شپ کا کامیاب دفاع کیا۔
گریڈ : B+
ویمن رائل رمبل میچ
اس میچ کو جیتا تو اس ریسلر نے ہی، جس کا نام مقابلے سے پہلے لیا جارہا تھا مگر اس کی آمد کافی غیرمتوقع تھی بلکہ ایک اور ریسلر کی انجری کا فائدہ اٹھا کر اسے رنگ میں داخل ہونے کا موقع ملا، اور فاتح ریسلر بیکی لنچ تھیں جنہیں مقابلے میں شرکت کا موقع لانا کی انجری کے باعث بنا، یہ ریسلر رنگ تک پہنچنے میں ناکام ہورہی تھی جس کی وج ہسے بھی میچ 71 منٹ طویل ہوگیا۔ امیچ کے آخر میں بیکی لنچ کے مقابلے میں شیرولیٹ فلیئر، کارمیلا، بیلے اور نیا جیکس بچے تھے، جن میں سے پہلے کارمیلا، پھر بیلے باہر ہوئیں، اس کے بعد نیا جیکس کو بیکی لنچ نے باہر کیا اور آخر میں شیرولیٹ کو رنگ سے باہر پھینک کر ریسل مینیا کے چیمپئن شپ مقابلے کے لیے اپنی جگہ پکی کرلی، امکان یہی ہے کہ وہ را ویمن چیمپئن رونڈا راﺅسی سے مقابلہ کرنا پسند کریں گی۔
گریڈ : A+