کراچی کے نیشنل اسٹیڈیم میں پاکستان سپر لیگ (پی ایس ایل) 2019 کی اختتامی تقریب منعقد ہوئی، چیئرمین پاکستان کرکٹ بورڈ (پی سی بی) احسان مانی کے خطاب سے تقریب کا آغاز ہوا۔

اس موقع پر چیئرمین پی سی بی نے حکومت اور سیکیورٹی اداروں کا شکریہ ادا کیا اور کراچی کے عوام کو مخاطب کرتے ہوئے کہا کہ اگر کسی کو سب سے بڑا ایوارڈ دینا چاہیے تو وہ کراچی کے لوگوں کو دینا چاہیے۔

اس موقع پر وزیرِاعلیٰ سندھ مراد علی شاہ کا کہنا تھا کہ ہم نے 2 سال قبل اسی میدان میں کہا تھا کہ ہم پی ایس ایل کراچی لے آئیں گے، آج حکومت اور کراچی والوں نے یہ کر دکھایا۔

پاک فوج کے سربراہ جنرل قمر جاوید باجوہ، پاک فوج کے شعبہ تعلقاتِ عامہ (آئی ایس پی آر) کے ڈائریکٹر جنرل (ڈی جی) میجر جنرل آصف غفور اور ڈائریکٹر جنرل (ڈی جی) رینجرز سندھ میجر جنرل محمد سعید بھی پی ایس ایل فائنل دیکھنے کے لیے اسٹیڈیم پہنچے۔

اعلیٰ شخصیات کے خطاب کے بعد ایونٹ میں پاکستانی فنکاروں نے اپنی پرفارمنس سے شائقین کو محظوظ کیا۔

نیشنل اسٹیڈیم کراچی تماشائیوں سے کھچاکھچ بھرا ہوا تھا اور 28 ہزار سے زائد افراد میچ دیکھنے کے لیے اسٹیڈیم پہنچے تھے۔

پی ایس ایل 2019 کے فائنل سے پہلے اختتامی تقریب کے باقاعدہ آغاز سے قبل نیوزی لینڈ میں شہید ہونے والے نمازیوں سے اظہارِ یکجہتی کیا گیا اور اسٹیڈیم میں ایک منٹ کی خاموشی اختیار کی گئی۔