بچوں کو ٹھوس غذائیں کب متعارف کروانی چاہیئں؟
جب آپ کا بچہ ٹھوس غذا استعمال کرنا شروع کردے تو یہ یقیناً ایک سنگ میل عبور کرنے کے مترادف ہے اور والدین کی خوشی بھی اپنی جگہ درست ہے۔ لیکن یہاں یہ سوال ضرور اٹھنا چاہیے کہ آخر بچوں کو ٹھوس غذا دینے کا صحیح وقت کون سا ہے؟
بچوں میں کئی ایسی علامات نظر آنا شروع ہوجاتی ہیں جن سے اندازہ ہوجاتا ہے کہ اب انہیں ٹھوس غذا دینے کا وقت آچکا ہے۔ لیکن ہم بچوں میں ہونے والی چند تبدیلیوں کو بھی علامات سمجھ کر بچوں کو وقت سے پہلے ٹھوس غذا دینا شروع کردیتے ہیں۔
چنانچہ اس سے پہلے کہ آپ اپنے بچوں کو ٹھوس غذا دینا شروع کریں، آپ کو بچوں میں پیدا ہونے والی ان 3 تبدیلیوں کے بارے میں جان لینا چاہیے جنہیں آپ علامات سمجھ بیٹھتے ہیں۔
وزن میں اضافہ
آپ نے یہ بات شاید متعدد لوگوں سے سن رکھی ہو کہ اگر بچے کا وزن پیدائشی وزن سے دگنا ہوجائے تو اس کا مطلب یہ ہے کہ انہیں ٹھوس غذا دینے کا وقت آگیا ہے۔ لیکن ایسا نہیں ہے کیونکہ کئی بچے تو محض 3 سے 4 ماہ کے اندر ہی اپنا وزن دگنا بڑھا لیتے ہیں اور اس عمر میں بچے ٹھوس غذا کے لیے تیار نہیں ہوتے۔ غذا کے استعمال کا وزن میں اضافے سے کوئی تعلق نہیں ہوتا ہے۔ بچوں کو ٹھوس غذا متعارف کروانے کی سب سے بہترین عمر 6 ماہ ہے۔