وادی کیلاش کا مذہبی تہوار چاوموس 2019 کا اختتام
خیبر پختونخوا کے ضلع چترال کی وادی کیلاش کا سالانہ 15 روزہ مذہبی تہوار چاوموس اختتام پذیر ہوگیا جہاں آخری روز کمیونٹی ہال میں رقص کی محفل منعقد ہوئی۔
محکمہ سیاحت کے زیرانتظام منعقدہ کیلاش کے 15 روزہ مذہبی تہوار کے دوران شیخاندہ کا علاقہ پہلی بار سیاحوں کے لیے کھول دیا گیا تھا جہاں بزکشی کے مقابلے تہوار کی مناسبت سے مختلف رسومات کی ادا کی گئیں۔
چترالی کی وادی کیلاش میں چاوموس تہوار گزرے سال کو الواداع جبکہ نئے سال کو خوش آمدید کہنے کے لئے منایا جاتا ہے اور اس تہوار میں کئی نئے جوڑے زندگی کے بندھن میں بندھ جاتے ہیں اور اس تہوار میں پسند کی شادی کا اظہار بھی کیا جاتا ہے۔
تہوار کے آخری روز صبح سویرے مذہبی رسم لواک بیاک ادا کی گئی جس کے بعد گاؤں بتریک کے پہاڑی علاقے میں لومڑی کی تلاش شروع کی گئی جو اس تہوار کا نہایت ہی دلچسپ حصہ ہےاور تلاش کے بعد لومڑی کو ڈھونڈ نکالا گیا جس کو نئے سال کے لیے نیک شگون قرار دیا گیا۔
برون کے مقام پر ڈانسنگ پلیس میں حسب روایت منعقدہ اختتامی تقریب منعقد ہوئی جہاں مقامی رقص کیا گیا اورتہوار کے لیے مخصوص گانے گا کر ماحول کو دوبال کردیا گیا۔
اس موقع پر کیلاش کے مختلف گاؤں سے آئے مرد و خواتین میں گانے کا دلچسپ مقابلہ بھی ہوا اور بزرگوں نے کیلاش قبیلے کی بہادری اور جرات کی داستانیں نو جوان نسل کو بیان کی۔