9 مئی مقدمات: شیخ رشید کی ضمانت میں 10جنوری تک توسیع
راولپنڈی کی انسدادِ دہشت گردی عدالت نے 9 مئی سے متعلق کیس میں عوامی مسلم لیگ کے سربراہ اور سابق وفاقی وزیر شیخ رشید احمد کی درخواست ضمانت میں 10جنوری تک توسیع کر دی۔
ڈان نیوز کے مطابق درخواست ضمانت کی سماعت انسداددہشتگردی عدالت کے جج ملک اعجاز اصف نے کی۔
درخواست ضمانت کی سماعت کے موقع پر وکیل صفائی سردار رازق ہائی کورٹ میں مصروفیت کے باعث پیش نہ ہوئے۔
عدالت نے شیخ رشید احمد کی درخواست ضمانت میں 10جنوری تک توسیع کر دی۔
خیال رہے کہ 9 دسمبر 2023 کو ہونے والی آخری سماعت میں 9 مئی مقدمات میں شیخ رشید کی عبوری ضمانتوں میں 4 جنوری تک توسیع کردی گئی۔
انسدادِ دہشت گردی کی عدالت کے جج ملک اعجاز آصف نے کیسز کی سماعت کی تھی، کیسز کا مکمل ریکارڈ پیش نہ کرنے پر عدالت نے برہمی کا اظہار بھی کیا تھا۔
سرکاری پراسیکیوٹر نے کہا تھا کہ تفتیش جاری ہے مزید موقع دیا جائے، جس پر عدالت نے آئندہ تاریخ تک تفتیش مکمل کر کے ریکارڈ پیش کرنے کی ہدایت کر دی۔
دریں اثنا عدالت نے شیخ رشید اور اُن کے بھتیجے شیخ راشد شفیق کی عبوری ضمانتوں میں بھی 9 جنوری تک توسیع کردی تھی۔