آپ لوگوں کی ٹنڈیں کرکے سوشل میڈیا پر اپ لوڈ کر رہے ہیں، عدالت پولیس رویے پر برہم
لاہور ہائیکورٹ کے جسٹس علی ضیا باجوہ نے پتنگ بازوں کی ویڈیوز اپ لوڈ کرنے کے کیس میں پولیس کے رویے پر برہمی کا اظہار کرتے ہوئے کاہ کہ آپ لوگوں کی ٹنڈیں کرکے سوشل میڈیا پر اپ لوڈ کر رہے ہیں۔
لاہور ہائی کورٹ میں پولیس کی جانب سے پتنگ بازوں کو گنجا کر کے ویڈیو اپ لوڈ کرنے کے خلاف درخواست پر سماعت ہوئی، جسٹس علی ضیا باجوہ نے وشال شاکر کی درخواست پر سماعت کی۔
دوران سماعت، جسٹس علی ضیا باجوہ نے پولیس کے رویے پر برہمی کا اظہار کرتے ہوئے کہا کہ آپ لوگوں کی ٹنڈیں کرکے سوشل میڈیا پر اپ لوڈ کر رہے ہیں۔
جسٹس علی ضیا باجوہ نے ریمارکس دیے کہ اس طرح کی ویڈیو لاہور پولیس کے آفیشل پیج پر اپ لوڈ ہوئی ہیں، یہ ڈسپلن فورس ہے کسی کی ذاتی ملکیت نہیں ہے، کوئی کالا چور بھی ہو اس کو قانون کے مطابق سزا دیں۔
عدالت نے کہا کہ یہ کوئی طریقہ نہیں ہے آپ لوگوں کو گنجا کر کے انڈین گانے لگا کر اسے اپ لوڈ کریں، ڈی آئی جی آپریشنز لاہور کل عدالت میں پیش ہو کر وضاحت کریں۔
جسٹس علی ضیا باجوہ نے کہا کہ آئی جی پنجاب بھی کل سینیر افیسر کے زریعے رپورٹ عدالت میں پیش کریں،
بعد ازاں، عدالت نے متعلقہ فورم سے رجوع نہ کرنے کارجسٹرار آفس کا اعتراض بھی ختم کر دیا اور کارروائی کل تک ملتوی کردی۔
واضح رہے کہ درخواست گزار نے پولیس کی جانب سے پتنگ بازوں کو گرفتار کرنے کے بعد ان کو گنجا کر کے ویڈیو اپ لوڈ کرنے کے خلاف درخواست دائر کررکھی ہے۔