باجوڑ: سالارزئی کی لرآمدک قوم کے گرینڈ جرگے کا دہشتگردوں کو پناہ نہ دینے کا اعلان
باجوڑ میں دہشت گردوں کے خلاف سیکیورٹی فورسز کی جانب سے ٹارگٹڈ کارروائیاں جاری ہیں، جب کہ سالارزئی کی لرآمدک قوم کے گرینڈ جرگے نے دہشت گردوں کو پناہ نہ دینے کا اعلان کیا ہے۔
ڈان نیوز کے مطابق سرکاری ذرائع کا کہنا ہے کہ باجوڑ کی تحصیل ماموند اور لوئی ماموند میں دہشت گرد موجود ہیں، ماموند اور لوئی ماموند میں انٹیلی جنس کی بنیاد پر کارروائیاں کی جا رہی ہیں، ٹارگٹڈ کارروائیوں کے دوران عوام کی سہولت کے لیے صوبائی اور مقامی انتظامیہ، ریاستی اداروں کے ساتھ مل کر انتظامات کر رہی ہے۔
سالارزئی کی لرآمدک قوم کے گرینڈ جرگے نے دہشت گردوں کو پناہ نہ دینے کا اعلان کیا ہے، گرینڈ جرگے نے فیصلہ کیا ہے کہ سالارزئی میں کسی کو بھی اجازت نہیں دیتے کہ وہ امن خراب کرے یا دہشت گردی پھیلائے۔
سرکاری ذرائع کا کہنا ہے کہ عوام اور مقامی مشران دہشت گرد خارجیوں کے خلاف ریاست کاساتھ دے رہے ہیں، ملک بھر میں سیکیورٹی فورسز روزانہ کی بنیاد پر تقریباً 200 سے زائد انٹیلی جنس بیسڈ آپریشنز کرتی ہیں۔
باجوڑ میں کئی دن سے تحصیل لوئی ماموند سے کثیر تعداد میں لوگوں کی نقل مکانی جاری ہے، ضلعی انتظامیہ نے متاثرین کے لیے 107 سرکاری اسکول اور کالجز خالی کرا دیے ہیں۔
باجوڑ اسپورٹس کمپلیکس میں 450 ٹینٹس پر مشتمل کیمپ قائم کیا گیا ہے۔
سیکیورٹی ذرائع کا کہنا ہے کہ آخری دہشت گرد کے خاتمے تک سیکیورٹی فورسز ان ملک دشمن عناصر کے خلاف برسرِ پیکار رہیں گی۔