لاہور: 30 روپے کے تنازع پر قتل کیے گئے 2 بھائیوں کے کیس میں اہم پیشرفت
لاہور کے علاقے رائے ونڈ میں پھل خریدنے پر 30 روپے کے تنازع پر دو بھائیوں کے قتل کیس میں اہم پیشرفت ہوئی ہے، گرفتار مرکزی ملزم کو کرائم کنٹرول ڈپارٹمنٹ (سی سی ڈی) کے حوالے کردیا گیا۔
ڈان نیوز کے مطابق مدعی کے وکیل احمد علی اعوان نے بتایا ہے کہ پولیس کی جانب سے مرکزی ملزم اویس کو آج گرفتار کیا گیا تھا جس کے بعد گرفتار مرکزی ملزم کو سی سی ڈی کے حوالے کر دیا گیا ہے۔
احمد علی اعوان کا کہنا تھا کہ دوسرا ملزم ابھی پولیس کی حراست میں ہے جب کہ پولیس کی جانب سے دیگر شریک ملزمان کی گرفتاری کے لیے چھاپے مارے جا رہے ہیں۔
خیال رہے کہ چند روز قبل لاہور روڈ پر پھلوں کی خریداری کے دوران دونوں بھائیوں اور پھل فروش کے درمیان تکرار کے بعد پیش آیا تھا۔
دونوں بھائیوں نے پھل خریدے، پھل فروش نے 130 روپے طلب کیے، خریدار بھائی پیسے دینے لگا تو ان کے پاس 100 روپے اور 5 ہزار کے نوٹ تھے۔
اس دوران 30 روپے کی ادائیگی پر تکرار ہوگئی اور نوبت جھگڑے تک جا ہپنچی، جس پر پر پھل فروش نے اپنی ساتھیوں کو فون کرکے بلالیا، جو قریب ہی کرکٹ کھیل رہے تھے۔
جھگڑا شدت اختیار کرنے پر پھل فروش کے ساتھیوں نے کرکٹ بیٹ سے دونوں بھائیوں واجد اور راشد پر بدترین تشدد کیا جس سے ایک بھائی موقع پر ہی جاں بحق ہوگیا اور دوسرے کو شدید تشویشناک حالت میں ہسپتال منتقل کیا گیا، جہاں واجد زخموں کی تاب نہ لاتے ہوئے دم توڑ گیا۔
ملزمان کے خلاف قتل کی دفعات کے تحت مقدمہ درج کیا گیا تھا۔