یاسمین راشد نے لاہور ہائیکورٹ میں 9 مئی کے 3 مقدمات میں سزاؤں کیخلاف اپیلیں دائر کردیں
پاکستان تحریک انصاف ( پی ٹی آئی) کی رہنما ڈاکٹر یاسمین راشد نے لاہور ہائی کورٹ میں 9 مئی کے 3 مقدمات میں سزاؤں کے خلاف اپیلیں دائر کر دیں۔
ڈان نیوز کے مطابق یاسمین راشد کی جانب سے اپیلیں تھانہ شادمان، شیرپاؤ پل، جناح ہاؤس کے قریب گاڑیاں جلانے کے مقدمات میں دائر کی گئی ہیں۔
اپیل میں مؤقف اختیار کیا گیا ہے کہ ٹرائل کورٹ نے حقائق کا درست جائزہ نہیں لیا، سزائیں معطل کی جائیں، لاہور ہائی کورٹ حتمی فیصلے تک سزا معطل کرکے رہائی کا حکم جاری کرے۔
لاہور کی انسداد دہشت گردی کی خصوصی عدالت نے پی ٹی آئی کی رہنما یاسمین راشد دیگر رہنماؤں کو 9 مئی کے مختلف مقدمات میں سزائیں سنائی تھیں۔
واضح رہے کہ 11 اگست کو لاہور کی انسداد دہشت گردی کی خصوصی عدالت نے 9 مئی کے 2 مقدمات میں پاکستان تحریک انصاف کے وائس چیئرمین شاہ محمود قریشی کو بری کردیا تھا، جب کہ یاسمین راشد، میاں محمود الرشید، اعجاز چوہدری اور عمرسرفراز چیمہ کو 10، 10 سال قید کی سزا سنا دی تھی۔
انسداد دہشت گردی عدالت کے جج منظر علی گل نے کوٹ لکھپت جیل میں 9 مئی کے کیسز کی سماعت کی تھی، عدالت نے 9 مئی کو راحت بیکری کے باہر گاڑیاں جلانے اور تھانہ شادمان کو آگ لگانے کے مقدمات کا فیصلہ سنایا، شاہ محمود قریشی کو دونوں مقدمات میں بری کردیا گیا تھا۔
انسداد دہشت گردی عدالت لاہور نے پی ٹی آئی پنجاب کی چیف آرگنائزر عالیہ حمزہ اور صنم جاوید کو تھانہ شادمان جلانے کے کیس میں 5، 5 سال قید کی سزا سنائی تھی۔