کوئٹہ: پاکستان کے جنوب مغرب کے علاقے میں یونیورسٹی بس کے قریب ہونے والے ایک کار بم دھماکے سے چار افراد ہلاک اور چالیس سے زائد زخمی ہوگئے، جن میں سے زیادہ تر شیعہ طالب علم تھے۔

یہ حملہ بلوچستان کے دارلحکومت کوئٹہ کے مضافاتی علاقے میں ہوا۔

مقامی پولیس کے سربراہ میر زبیر نے بتایا کہ امپروائز ایکسپلوسیف ڈیوائس کو سڑک کنارے کھڑی ایک گاڑی میں نصب کیا گیا تھا جو کہ مقامی آئی ٹی یونیورسٹی کی بس کے قریب پھٹا۔ اس حادثے میں چار افراد ہلاک ہوئے اور چالیس سے زائد زخمی ہوئے جن میں سے زیادہ تر طالب علم ہی تھے۔

انھوں نے کہا کہ حملے کا ہدف وہ بس تھی جس میں زیادہ تر شیعہ طالب علم تھے۔

میر زبیر کے مطابق دھماکے میں تین طالب علم اور ایک راہگیر ہلاک ہوا۔

اس کے علاوہ مقامی سول ہسپتال کے ڈاکٹر محمد نواز نے بتایا کہ زخمیوں کو مزید تحفظ فراہم کرنے کے لیئے ملٹری ہسپتال میں منتقل کردیا گیا ہے۔

البتہ ابھی تک کسی نے بھی اس حملے کی ذمہ داری قبول نہیں کی ہے۔