اسلام آباد: الیکشن کمیشن نے میڈیا کے لئے بھی ضابطہ اخلاق جاری کردیا ہے، ضابطہ اخلاق میں غیر جانبدارانہ اور متوازن کوریج یقینی بنانے اور کالعدم تنظیموں کو وقت نہ دینے کی تاکید کی گئی ہے۔

ڈان نیوز کے مطابق ضابطہ اخلاق میں تمام امیدواروں کو یکساں اور اقلیتی امیدواروں کو خصوصی وقت دینے کا کہا گیا ہے۔

ضابطہ اخلاق میں کالعدم جماعتوں کو وقت نہ دینے اور نفرت و تعصب پر مبنی مباحثے نشر نہ کرنے کی بھی تاکید کی گئی۔

کمیشن نے آزادانہ اور ذمہ دارانہ رپورٹنگ کے لئے تمام سیاسی جماعتوں اور ریاستی اداروں سے تعاون کی اپیل کی ہے۔

 ضابطہ اخلاق کے مطابق میڈیا کے ذریعے کسی جماعت یا امیدوار کے بدنامی کی صورت میں میڈیا ہی ازالہ کرے گا جبکہ سیاسی جماعت کی انتخابی مہم کے مواد کواشتہار یا پیڈ پروگرام کے طور پر واضح بھی کرنا ہوگا۔