نوجوانوں میں آنتوں کے کینسر میں خطرناک اضافہ، ماہرین نے خاموش بحران قرار دے دیا
ایک حالیہ تحقیق میں انکشاف ہوا ہے کہ دنیا بھر میں نوجوانوں میں بڑی آنت اور نظامِ ہاضمہ سے متعلق کینسر تیزی سے بڑھ رہا ہے، جسے ماہرین نے ایک خاموش عالمی بحران قرار دیا ہے۔
طبی ویب سائٹ کے مطابق، حالیہ تحقیق میں انکشاف ہوا ہے کہ دنیا بھر میں نوجوانوں میں نظامِ ہاضمہ، بشمول آنتوں اور معدے سے متعلق کینسر کے کیسز میں خطرناک حد تک اضافہ ہو رہا ہے۔
ماہرین اس تیزی سے بڑھتے ہوئے رجحان کو ایک ’خاموش عالمی بحران‘ قرار دے رہے ہیں۔
تحقیق کے مطابق، 50 سال سے کم عمر افراد خصوصاً 20 سے 40 سال کے درمیان کے افراد بڑی تعداد میں بڑی آنت کے کینسر کا شکار ہو رہے ہیں اور گزشتہ دو دہائیوں کے دوران اس میں غیر معمولی اضافہ دیکھا گیا ہے۔
امریکا میں 20 سے 24 سال کے نوجوانوں میں بڑی آنت کے کینسر کی شرح میں 8.4 فیصد اضافہ ریکارڈ کیا گیا ہے، جب کہ یورپ میں 20 سے 29 سال کے افراد میں اس بیماری کی شرح میں سالانہ 7.9 فیصد اضافہ ہو رہا ہے۔
تحقیق میں نشاندہی کی گئی ہے کہ 1990 کے بعد پیدا ہونے والے افراد میں بڑی آنت کے کینسر کا خطرہ پچھلی نسلوں کے مقابلے میں دوگنا زیادہ ہو چکا ہے۔
ماہرین کے مطابق، اس رجحان کی ممکنہ وجوہات میں موٹاپا، غیر صحت مند طرزِ زندگی، زیادہ پراسیسڈ کھانوں اور چینی سے بھرپور مشروبات کا استعمال، تمباکو نوشی، شراب نوشی، معدے میں مضر بیکٹیریا اور چربی والا جگر شامل ہو سکتے ہیں۔
ان کا کہنا ہے کہ نوجوانوں میں اس بیماری کی بروقت تشخیص ایک بڑا مسئلہ بنتی جا رہی ہے، کیونکہ مریض اور بعض اوقات ڈاکٹر بھی ابتدائی علامات کو سنجیدگی سے نہیں لیتے، جس کی وجہ سے اکثر مریضوں میں بیماری کا پتہ آخری مرحلے پر چلتا ہے۔
رپورٹ میں بتایا گیا ہے کہ نوجوان مریضوں کو جسمانی صحت کے ساتھ ساتھ ذہنی، معاشی اور سماجی چیلنجز کا بھی سامنا ہوتا ہے، خاص طور پر شادی شدہ نوجوانوں یا بچوں کے والدین کے لیے یہ بیماری خاندانی زندگی پر گہرے اثرات ڈالتی ہے۔
بعدازاں ماہرین نے تجویز دی ہے کہ اسکریننگ کی عمر 45 سال سے پہلے شروع ہونی چاہیے، خاص طور پر اگر خاندان میں اس بیماری کی تاریخ موجود ہو، ساتھ ہی نوجوانوں کو چاہیے کہ وہ صحت مند غذا، باقاعدہ ورزش اور تمباکو و شراب سے پرہیز کو اپنی زندگی کا حصہ بنائیں اور اگر پیٹ میں مسلسل درد، خون آنا، وزن میں غیر واضح کمی یا نظامِ ہاضمہ میں خرابی ہو تو فوری طور پر معالج سے رجوع کریں۔
لائیو ٹی وی