خیبرپختونخوا اسمبلی کی مخصوص نشستوں سے متعلق نئی پارٹی پوزیشن جاری
الیکشن کمیشن نے خیبر پختونخوا اسمبلی کی مخصوص نشستوں سے متعلق فیصلے کے بعد نئی پارٹی پوزیشن جاری کردی۔
الیکشن کمیشن کی جانب سے جاری کردہ نوٹیفکیشن کے مطابق خیبرپختونخوا اسمبلی میں جمعیت علمائے اسلام (جے یوآئی ف) اور پیپلزپارٹی کی ایک، ایک خاتون کے لیے مخصوص نشست ختم ہوگئی۔
نوٹیفکیشن کے مطابق خواتین کے لیے مخصوص ایک نشست مسلم لیگ (ن) کو مل گئی، اس طرح جے یو آئی (ف) اور مسلم لیگ(ن) کی مخصوص نشستوں کی تعداد 9،9 ہوگئی۔
نوٹیفکیشن میں کہا گیا ہے کہ پاکستان پیپلزپارٹی کی مخصوص نشستوں کی تعداد5 ہوگئی ہے جبکہ اے این پی اور پی ٹی آئی پارلیمنٹیرینزکی ایک، ایک مخصوص نشست ہے۔
الیکشن کمیشن کے نوٹیفکیشن میں سنی اتحاد کونسل اور پی ٹی آئی کے تمام اراکین کو آزاد قرار دیا گیا ہے۔
الیکشن کمیشن کے مطابق خیبرپختونخوا اسمبلی میں آزاد اراکین کی تعداد 91 ہوگئی ۔
خیال رہے کہ گزشتہ روز الیکشن کمیشن نے خیبر پختونخوا اسمبلی کی مخصوص نشستوں سے متعلق مسلم لیگ ( ن ) کی درخواست پر فیصلہ جاری کردیا تھا۔
الیکشن کمیشن نے خیبر پختونخوا میں مخصوص نشستوں سے متعلق پاکستان مسلم لیگ (ن) کی درخواست منظور کر لی تھی۔
فیصلے میں کہا گیا تھا کہ اقلیتی نشست پر (ن) لیگ اور جے یو آئی (ف) میں ٹاس ہوگا، خیبرپختونخوا اسمبلی میں مسلم لیگ (ن) کو 9، جمعیت علمائے اسلام (ف) کو 9، پیپلزپارٹی کو 5، پاکستان تحریک انصاف پارلیمنٹیرینز اور عوامی نیشنل پارٹی کو ایک ایک اضافی نشست ملی۔
مزید کہا گیا تھا کہ مسلم لیگ (ن) لیگ کو خیبر پختوانخوا اسمبلی میں خاتون کی نشست بھی مل گئی، جبکہ خواتین کے لیے مخصوص نشست پر اے این پی اور پی ٹی آئی پی کے مابین ٹاس ہوگا۔
واضح رہے کہ 14 جولائی کو الیکشن کمیشن نے خیبرپختونخوا اسمبلی کی مخصوص نشستوں کی تقسیم کے کیس پر فریقین کے دلائل مکمل ہونے پر فیصلہ محفوظ کر لیا تھا۔
چیف الیکشن کمشنر کی سربراہی میں 5 رکنی بینچ نے کیس کی سماعت کی تھی، اس دوران 5 سیاسی جماعتوں اور 21 امیدواروں نے مؤقف پیش کیا تھا۔
لائیو ٹی وی