افغان خاتون ’ناجائز تعلقات‘ پر سنگسار
کابل: افغانستان میں ایک نوجوان خاتون کو ہم عمر نوجوان مرد کے ساتھ ’ناجائز تعلقات‘ رکھنے پر سنگسار کردیا گیا۔
خبر رساں ادارے اے ایف پی کے مطابق افغان میڈیا پر نشر ہونے والے 30 سیکنڈ کے ویڈیو کلپ میں دیکھا جاسکتا ہے کہ خاتون کو ایک گڑھے میں ڈال کر اس پر مردوں کا ایک ہجوم پتھر برسا رہا ہے۔
حکام نے خاتون کی شناخت رخسانہ کے نام سے کی جبکہ اس کی عمر 19 سے 21 سال کے درمیان بتائی گئی۔
حکام کا کہنا ہے کہ مذکورہ واقعہ طالبان کے زیر اثر صوبے غور کے وسطی علاقے میں پیش آیا، جبکہ اس بات کی بھی تصدیق کی گئی ہے کہ ویڈیو بین الاقوامی براڈ کاسٹر ریڈیو فری یورپ/ ریڈیو لبرٹی کی جانب سے جاری کی گئی.
صوبہ غور کی خاتون گورنر سیما جویندا کے ترجمان کا کہنا تھا کہ ’میڈیا میں نشر کی جانے والی ویڈیو رخسانہ سے متعلق ہے، جسے سنگسار کیا گیا۔‘
ترجمان نے بتایا کہ نوجوان مرد کو کوڑے لگانے کے بعد چھوڑ دیا گیا۔