ہندوستانی فورسز نے 5 کشمیری قتل کردیئے
سری نگر: ہندوستان کے زیر انتظام کشمیر کے شمالی ضلع کپواڑہ میں 5 کشمیری نوجوان ہندوستانی فورسز کی گولیوں کا نشانہ بن گئے۔
انڈین ایکسپریس کی ایک رپورٹ میں مذکورہ واقعے میں دو فوجیوں کے زخمی ہونے دعویٰ بھی کیا جارہا ہے، جن کو طبی امداد کیلئے ہسپتال منتقل کیا گیا۔
مارے جانے والے کشمیری نوجوانوں کے حوالے سے رپورٹ میں دعویٰ کیا گیا کہ ان نوجوانوں کو ہندوستانی فورسز اور پولیس نے مشترکہ آپریشن کے دوران سری نگر سے 81 کلومیٹر دور واقع ضلع کپواڑہ کے ایک گاؤں ڈروگمولا میں مقابلے کے دوران ہلاک کیا۔
دوسری جانب کشمیر کے مقامی میڈیا کی رپورٹس میں اس واقعے کو ریاستی دہشت گردی قرار دیتے ہوئے دعویٰ کیا گیا ہے کہ کپواڑہ کے ایک گاؤں ڈروگمولا میں ہندوستانی فورسز نے گھر گھر تلاشی کے دوران 5 نہتے کشمیری نوجوانوں کو فائرنگ کرکے قتل کیا۔
مقامی میڈیا کی ایک اور رپورٹ میں بتایا گیا کہ ہندوستان کے زیر انتظام کشمیر کے دارالحکومت سری نگر میں شہدا قبرستان کی جانب ہونے والے مارچ کو روکنے کیلئے ہندوستانی انتظامیہ نے شہر میں کرفیو لگایا۔