نوٹنگھم: پاکستان اور انگلینڈ کی کرکٹ ٹیمیں تیسرے میچ میں ٹرینٹ برج میں 30 اگست کو مدمقابل ہوں گی جس کے لیے دونوں ٹیموں نے ہیڈکوچ، فیلڈنگ کوچ اور ٹیم انتظامیہ کے ساتھ پریکٹس کی۔

انگلینڈ نے اب تک کھیلے گئے دونوں میچوں میں کامیابی حاصل کرکے 5 میچوں کی سیریز میں 0-2 کی برتری حاصل کرلی ہے۔

پاکستان ٹیم کو انگلینڈ کے خلاف سیریز میں کامیابی حاصل کرکے آئی سی سی کی درجہ بندی میں اپنی پوزیشن بہتر بنانی ہے اور ورلڈ کپ 2019 میں براہ راست رسائی کے لیے سرفہرست 7 ٹیموں میں شامل ہونا ضروری ہے۔

ورلڈ کپ 2019 کا انعقاد انگلینڈ میں ہوگا جس میں میزبان انگلینڈ کے علاوہ درجہ بندی میں شامل سرفہرست 7 ٹیمیں براہ راست شرکت کریں گی جبکہ دیگر دوٹیموں کے لیے 2018 میں کوالیفائنگ ٹورنامنٹ کا انعقاد ہوگا۔

پاکستان ٹیم نے انگلینڈ کے خلاف سیریز سے قبل آئرلینڈ کے خلاف ایک میچ میں بھاری مارجن سے کامیابی حاصل کی تھی جبکہ دوسرا میچ بارش کی نذر ہوگیا تھا۔