نڈال، سرینا آسٹریلین اوپن کے چوتھے مرحلے میں
سابق عالمی نمبر ایک اسپین کے رافیل نڈال، آسٹریلین اوپن 2017 کے چوتھے مرحلے میں داخل ہوگئے ہیں اور خواتین کے مقابلوں میں امریکا کی سرینا ولیمز نے بھی اپنے میچ میں کامیابی حاصل کی۔
آسٹریلین اوپن کے چھٹے روز تیسرے مرحلے کے مقابلے ہوئے جس میں ہسپانوی کھلاڑی رافیل نڈال نے جرمنی کے الیگزینڈر زیوریف کو 4-6، 6-3، 6-7، 6-3 اور 6-2 کے سخت مقابلے کے بعد شکست دے دی۔
جرمن کھلاڑی نے نڈال کا ڈٹ کر مقابلہ کیا اور آسان ترنوالہ ثابت نہیں ہوئے۔
نڈال اگلے مرحلے میں فرانسیسی کھلاڑی گائل مونفلز سے ٹکرائیں گے جنھوں نے جرمن کھلاڑی فلپ کوہلشریبر کو 6-3، 7-6 اور6-4 سے زیر کرکے ایونٹ کے چوتھے مرحلے میں پہنچنے کا اعزاز حاصل کیا۔
دیگر مقابلوں میں اسپین کے روبرٹو بوتستا نے ہم وطن ڈیوڈ فیرر کو 7-5، 6-7 اور7-6 سے ہرادیا، بیلجیم کے ڈیوڈ گوفن نے کروشیا کے آئیو کارلووک کو 6-3، 6-2 اور 6-4 سے زیر کیا۔