کراچی میں 9 برس بعد بین الاقوامی کرکٹ کے بحالی ہوئی جہاں ویسٹ انڈیز کی ٹیم ٹی ٹوئنٹی سیریز کے لیے پہنچی تاہم وہ خاطر خوا کارکردگی دکھانے میں ناکام ہوئی اور سیریز میں 3-0 سے شکست کا سامنا کرنا پڑا۔

پاکستانی کھلاڑیوں نے اپنے ہوم گراؤنڈ میں تینوں میچوں میں بہترین کارکردگی کا مظاہرہ کرتے ہوئے تینوں میچوں میں کامیابی حاصل کرلی جہاں بابراعظم اور حسین طلعت جیسے نوجوان کھلاڑیوں نے اپنی صلاحیتوں کا بھرپور اظہار کیا۔

بابر اعظم کو سیریز اور فخرزمان کو سیریز کے آخری میچ کا بہترین کھلاڑی قرار دیا گیا۔

پاکستان نے اس سیریز میں 3-0 سے کامیابی کے بعد عالمی ٹی ٹوئنٹی درجہ بندی میں اپنی پہلی پوزیشن کو مزید مستحکم کرتے ہوئے 130 پوائنٹس حاصل کرلیے اور آسٹریلیا سے 4 پوائنٹس کی برتری بھی حاصل کرلی۔