کراچی میں پانی کے بحران سے شاہد آفریدی بھی پریشان
پاکستان کرکٹ ٹیم کے سابق کپتان شاہد آفریدی نے بھی پاکستان کے معاشی حب کراچی میں پانی کے مسائل پر لب کشائی کرتے ہوئے اسے تشویش ناک قرار دے دیا۔
سماجی رابطے کی ویب سائٹ ٹوئٹر پر اپنے ایک پیغام میں ریکارڈ ساز آل راؤنڈر شاہد آفریدی کا کہنا تھا کہ ملک میں حکومتیں آتی اور چلی جاتی ہیں لیکن پانی کا مسئلہ حل نہیں ہورہا۔
کراچی کی اہمیت اجاگر کرتے ہوئے شاہد آفریدی کا کہنا تھا کہ پاکستان کو وجود میں آئے ہوئے 70 برس ہوگئے لیکن پاکستان کے لیے شہ رگ کی حیثیت رکھنے والے کراچی شہر کے مسائل آج تک حل نہیں کیے جاسکے۔
اپنے پیغام میں شاہد آفریدی نے مزید کہا کہ سمندر کے کنارے پر واقع ہونے کے باوجود کراچی کے مکین پینے کے پانی کی بوند بوند کو ترس رہے ہیں۔
پاکستان کو بنے 70برس ہوگئے مگر کراچی شہر جو پاکستان کی شہ رگ کی حیثیت رکھتا ہے اس کےمسائل آج تک حل نہیں کئے جا سکے، سمندر کے کنارے ہونے کے باوجود اس شہر کے مکین پانی کے بوند بوند کو ترس رہے ہیں، حکومتیں آئیں اور گئیں مگر پانی کا مسئلہ ٹھیک نہیں کیا، آخر کب پانی کا مسئلہ حل ہوگا؟
— Shahid Afridi (@SAfridiOfficial) June 25, 2018
خیال رہے کہ کراچی میں پانی کا بحران شدید سے شدید تر ہوتا جارہا ہے اور شہر میں پانی کی قلت کی وجہ سے شہر میں احتجاج کا سلسلہ بھی شروع ہوگیا ہے۔
اس کے ساتھ ساتھ حب ڈیم میں پانی کی سطح خطرناک حد تک پہنچنے کے بعد کراچی اور حب شہر کو پانی کی فراہمی بند کیے جانے کا بھی امکان ہے۔
9 جون کو قلتِ آب کے حوالے سے سماعت کے دوران چیف جسٹس میاں ثاقب نثار نے ریمارکس دیے تھے کہ ’ہم نے پانی کی قلت کے خاتمے کا تہیہ کر لیا ہے، اب سپریم کورٹ ڈیمز بنانے سے متعلق آگے بڑھے گی اور کردار ادا کرے گی‘۔