اسموگ کا جن قابو کرنے کے لیے نئی حکومت کا بھی پرانا طریقہ؟
جنوبی ایشیا کے دیگر ممالک کی طرح موسم سرما میں اسموگ پاکستان کے کئی علاقوں، بالخصوص جنوبی و وسطی پنجاب میں شدید مسائل کا سبب بنتا رہا ہے۔ اسموگ کی گہری تہہ کے باعث نہ صرف معمولاتِ زندگی متاثر ہوتے ہیں بلکہ سانس اور بینائی کے امراض میں بھی شدت آجاتی ہے۔
گزشتہ 2 برسوں سے اکتوبر سے دسمبر تک گہرے اسموگ کی وجہ سے بے پناہ مسائل کا سامنا کرنے کے باوجود پنجاب اور مرکزی حکومتوں نے 2018ء میں اس صورتحال سے نمٹنے کے لیے کوئی مناسب منصوبہ بندی نہیں کی حالانکہ گزشتہ ماہ ستمبر میں نیپال سے تعلق رکھنے والے چند بین الاقوامی ماہرینِ ماحولیات نے جنوبی پنجاب کے اُن علاقوں کا دورہ کیا تھا جہاں روایتی طریقے سے چلنے والے اینٹوں کے بھٹوں کی تعداد تقریباً 2 ہزار سے زائد ہے۔
یہ بھٹے فضا میں انتہائی زہریلا دھواں خارج کرکے بے پناہ آلودگی کا سبب بن رہے ہیں۔ نیپالی ماہرین کے مطابق کوئلے سے چلنے والے ان بھٹوں میں 1 ہزار کے قریب اینٹوں کو پکانے سے تقریباً 2 کلوگرام زہریلا دھواں فضا میں خارج ہوتا ہے جو موسمِ سرما میں دھند کے ساتھ مل کر گہری اسموگ کا سبب بنتا ہے۔
کوئلے سے چلنے والے اینٹوں کے یہ بھٹے کچھ عرصے پہلے تک جنوبی ایشیا کے دیگر ممالک میں بھی شدید آلودگی کا سبب بن رہے تھے۔ لیکن اس کے سدِباب ایک نئی ٹیکنالوجی متعارف کروائی گئی جسے 'زگ زیگ ٹیکنالوجی' کا نام دیا گیا ہے۔ اس سے بھٹوں سے خارج ہونے والے دھوئیں میں 40 فیصد تک کمی ہوجاتی ہے۔
گزشتہ ماہ ستمبر میں ہی پنجاب کے محکمہءِ صحت کی جانب سے ایک متنازع اعلامیہ جاری کیا گیا تھا کہ موسمِ سرما شروع ہوتے ہی پنجاب بھر میں شدید اسموگ کے خدشے کے باعث صوبے میں روایتی طریقے سے چلنے والے تمام بھٹوں کو 20 اکتوبر سے 31 دسمبر تک بند رکھنے کا فیصلہ کیا گیا ہے جبکہ اس دوران جنوبی پنجاب کے ان علاقوں میں جانوروں کے چارے کو جلانے پر بھی پابندی ہوگی۔
محکمہءِ ماحولیات کے ڈپٹی ڈائریکٹر ظفر اقبال کے مطابق روایتی طریقے سے چلائے جانے والے ان بھٹوں میں سے کچھ میں زگ زیگ ٹیکنالوجی متعارف کروا دی گئی ہے جبکہ باقی بھٹہ مالکان کو پابند کیا گیا ہے کہ وہ پرانے طریقے کو جلد از جلد ترک کرتے ہوئے اپنے بھٹوں کو نئی ٹیکنالوجی کے مطابق ڈھالیں، اور جب تک ایسا نہیں ہوتا تب تک ان کے بھٹے عارضی طور پر بند رہیں گے۔
پنجاب بھر کے دیہی علاقوں میں قائم ان بھٹوں میں مزدوروں کے ساتھ بے رحمانہ سلوک، خواتین کے ساتھ جنسی زیادتی اور کم عمر بچوں سے محنت مزدوری کروانے کے واقعات آئے روز قومی میڈیا کا حصہ بنتے رہتے ہیں۔ مگر غریب دیہاتیوں کی حالت زار کو دیکھتے ہوئے بھی جاری کردہ اعلامیے میں ڈھائی ماہ بھٹے بند رہنے کی صورت میں ان کے لیے نہ تو کسی ماہانہ الاؤنس کا اعلان کیا گیا اور نہ ہی کسی دوسرے ذریعۂ روزگار کا انتظام کیا گیا ہے۔
شدید سردی میں جب کوئلے سمیت دیگر روایتی ایندھن کی قیمتیں آسمان پر پہنچی ہوئی ہوتی ہیں، ان غریب مزدوروں کا گزارا آخر کیسے ہوگا؟ لیکن شاید یہ محکمہءِ ماحولیات کا دردِ سر نہیں ہے کیونکہ ان کا کام صرف ماحول کی حفاظت سے متعلق اقدامات کرنا ہے۔
موجودہ صورتحال میں ہر کسی کے ذہن میں یہی سوال گردش کر رہا ہے کہ آیا اسموگ پر قابو پانے کے لیے بھٹوں پر پابندی کے علاوہ کیا کوئی اور راستہ موجود نہیں تھا؟ اگرچہ پچھلے برس اکتوبر سے جنوری تک شدید اسموگ کے بے پناہ مسائل کا سامنا رہا مگر صورتحال کی سنگینی کو بھانپتے ہوئے بروقت مناسب تحقیق کے بعد اقدامات کرنے کے بجائے آخری وقت میں ایک عارضی حل پیش کیا گیا جو اسی صورت میں قابلِ قبول ہوسکتا ہے جب ان بھٹوں پر مزدوری کرنے والے غریب دیہاتیوں کے لیے ہفتہ وار یا ماہانہ الاؤنس یا پھر کسی متبادل روزگار کا بروقت انتظام کیا جائے۔ ساتھ ہی آئندہ کے لیے سائنسی بنیادوں پر ایک مکمل حکمتِ عملی بنانے کا عمل ابھی سے شروع کیا جائے تاکہ اگلے برس ہم اسموگ کے ظالم اندھیرے سے احسن طریقے سے مقابلہ کرسکیں۔
اسموگ سے واقفیت حاصل کرنا ضروری ہے
اس مقصد کے لیے سب سے پہلے تو یہ جاننا ضروری ہے کہ اسموگ ہوتا کیا ہے؟ اسموگ دراصل فضائی آلودگی کی ایک نئی قسم ہے جو زیادہ تر شہری اور صنعتی علاقوں میں کوئلے اور دوسرے کیمیکلز کی زیادہ مقدار جلانے کے باعث پیدا ہوتی ہے۔
جنوبی ایشیا خصوصی دہلی اور پاکستان میں جنوبی پنجاب کے علاقوں میں گزشتہ کئی برس سے موسمِ سرما میں جو اسموگ مسائل کا سبب بن رہا ہے اسے سائنسی اصطلاح میں 'فوٹو کیمیکل اسموگ' کہا جاتا ہے جو سورج کی روشنی میں نائٹروجن آکسائیڈ، سلفر ڈائی آکسائیڈ اور اُڑ جانے والے نامیاتی مرکبات کے فضا میں کیمیائی عمل کے باعث پیدا ہوتا ہے۔