بھارت کے زیر انتظام کشمیر کے ضلع پلوامہ میں بھارتی فورسز نے حالیہ ریاستی دہشت گردی میں مزید ایک کشمیری نوجوان کو قتل کردیا۔

کرفیو کے باوجود کشمیری عوام کی بڑی تعداد نے شہید شوکت احمد بٹ کی نماز جنازہ میں شرکت کی۔

کاکاپورہ میں بھارتی افواج کے مظالم کا نشانہ بننے والے نوجوان نے جامعہ کشمیر سے فارمیسی میں گریجویشن کیا تھا۔

نوجوان کی ہلاکت کے بعد بھارتی فورسز کی جانب سے نماز جنازہ میں شرکت سے روکنے کے لیے ان کے آبائی گاؤں جانے والے تمام راستے بند کردیے تھے۔

نوجوان کی ہلاکت پر جامعہ کشمیر کے طلبا کی جانب سے شدید احتجاج بھی کیا گیا۔

بھارتی فورسز کی حالیہ ریاستی دہشت گردی میں نوجوان کشمیری کی ہلاکت پر مقبوضہ وادی میں حریت رہنماؤں کی جانب سے ہڑتال کی کال دی گئی تھی۔

گزشتہ روز سری نگر کے علاقے فتح کَدال میں محاصرہ کے بعد سرچ آپریشن کے دوران بھارتی فورسز نے 3 نوجوانوں کو فائرنگ کرکے جاں بحق کردیا تھا۔

واقعے کے بعد ضلع سری نگر میں تمام تعلیمی ادارے احتجاجاً بند کر دیئے گئے تھے جبکہ انتظامیہ نے مظاہروں کے پیش نظر انٹرنیٹ سروس معطل کردی تھی۔