وزیراعظم کے سامنے خاتون وزیر کو نامناسب انداز میں چھونے پر ہنگامہ
اگرچہ بھارت سمیت دنیا بھر سے خواتین کے ساتھ نامناسب رویے کی خبریں آئے دن سامنے آتی رہتی ہیں۔
تاہم اب بھارت میں وزیر اعظم نریندر مودی سمیت ریاستی وزیر اعلیٰ اور دیگر سیاسی رہنماؤں کی موجودگی میں ایک وزیر کی جانب سے ساتھی خاتون وزیر کو نامناسب انداز میں چھونے کا واقعہ سامنے آیا ہے۔
جی ہاں، بھارت کی مشرقی ریاست تریپورہ کے دارالحکومت اگرتلا میں ہونے والی ایک اعلیٰ سرکاری تقریب میں ریاستی وزیر کی جانب سے ساتھی خاتون وزیر کو سب کے سامنے اسٹیج پر نامناسب انداز میں چھونے کا واقعہ پیش آیا ہے۔
اس واقعے کی ویڈیو سامنے آنے کے بعد اگرچہ متاثرہ خاتون وزیر نے تاحال کوئی بیان نہیں دیا، تاہم ان کے ساتھ ہونے والے اس واقعے پر دیگر افراد نے آواز اٹھانا شروع کردیا ہے اور مرد وزیر کو ہٹانا کا مطالبہ بھی کیا ہے۔
بھارتی خبر رساں ادارے ’ایشین نیوز انٹرنیشنل‘ کے مطابق ریاست تریپورہ کے دارالحکومت اگرتلا میں ہونے والی ایک تقریب میں ریاست کے نوجوانوں اور کھیل کے وزیر منوج کانتی ڈیب نے اپنی ہی حکومت کی فلاح و بہبود اور تعلیم کی وزیر سنتا چکما کو نامناسب انداز میں چھوا۔