آسکر ایوارڈز کی تقریب 3 دہائی بعد میزبان کے بغیر ہوگی
فلمی دنیا کے سب سے معتبر ’آسکر ایوارڈز‘ کی تقریب سجنے میں 24 گھنٹے سے بھی کم وقت رہ گیا ہے اور فلمی شخصیات کو اس کا بے صبری سے انتظار ہے۔
91 ویں آسکر ایوارڈز میلے کی تقریب 24 فروری کو لاس اینجلس کے ڈولبے تھیٹر سینٹر میں ہوگی۔
اس بار آسکر ایوارڈز کی تقریب میں اگرچہ کئی کارنامے پہلے بار ہونے جا رہے ہیں، تاہم اس تقریب کا سب سے اہم کارنامہ یہ ہوگا کہ 30 سال بعد اس خوبصورت تقریب کا کوئی ایک میزبان نہیں ہوگا۔
جی ہاں، اس بار آسکر ایوارڈز کی تقریب کی میزبانی کو ایک یا 2 افراد نہیں بلکہ متعدد افراد کریں گے اور ممکنہ طور پر میزبانوں کی تعداد 2 درجن سے زائد ہو سکتی ہے۔
91 ویں آسکر ایوارڈز کی تقریب کے لیے اکیڈمی نے دسمبر 2018 میں میزبان کا اعلان کیا تھا اور امریکی کامیڈین کیون ہارٹ کو اس کے لیے منتخب کیا گیا تھا۔
تاہم انہیں میزبان منتخب کیے جانے کے فوری بعد ہی ان کی پرانی ٹوئیٹس پر سوشل میڈیا پر ہنگامہ ہوگیا اور اداکار کو اپنی پرانی باتوں پر معافی مانگنے کے لیے کہا گیا تھا۔
تاہم اداکار نے معافی مانگنے کے بجائے آسکر ایوارڈز کی تقریب کی میزبانی چھوڑنے کو اہم سمجھا اور اب یہ تقریب کسی ایک مخصوص میزبان کے بغیر ہی ہوگی۔