فلسطین میں اسرائیلی مظالم کے خلاف مزاحمت کی علامت سمجھی جانے والی احد تمیمی کا کہنا ہے کہ مقبوضہ مغربی کنارے میں ان کے گھر سے ان کے چھوٹے بھائی کو گرفتار کرلیا گیا۔

غیر ملکی خبر رساں ایجنسی 'اے پی' کے مطابق احد تمیمی کے والد باسِیم تمیمی نے کہا کہ پیر کو علی الصبح اسرائیلی فوجی ان کے گھر میں گھس آئے اور ان کے 15 سالہ بیٹے محمد کو گرفتار کر کے لے گئے۔

انہوں نے کہا کہ گزشتہ ہفتے کے آخر میں ہمارے گاؤں میں احتجاج کے دوران آنسو گیس سے بچنے کے لیے بھاگنے کے دوران محمد کا ایک بازو ٹوٹ گیا تھا اور اسے مشتبہ طور پر اسرائیلی فوجیوں پر پتھر پھینکنے کی وجہ سے گرفتار کیا گیا۔

مزید پڑھیں: اسرائیلی عدالت میں نابالغ فلسطینی لڑکی کے بند کمرہ فوجی ٹرائل کا آغاز

اسرائیلی فوج کا اپنے بیان میں کہنا تھا کہ اس نے فسادات اور افراتفری پھیلانے پر رات گئے 21 فلسطینیوں کو گرفتار کیا، تاہم مزید تفصیلات فراہم کی گئیں۔

واضح رہے کہ دو اسرائیلی فوجیوں کو تھپڑ مارنے پر احد تمیمی نے تقریباً 8 ماہ اسرائیل کی قید میں گزارے تھے۔

اسرائیلی فوجیوں کو تھپڑ مارنے کا واقعہ ویڈیو کے ذریعے عکس بند ہو گیا تھا جس نے احد تمیمی کو اسرائیلی مظالم کے خلاف مزاحمت کی علامت بنا دیا تھا۔

یہ بھی پڑھیں: فلسطین: عہد تمیمی کو ریال میڈرڈ جرسی کا اعزاز

ان کے بھائی کو گرفتار کیے جانے کی ویڈیو میں احد چیخ کر یہ کہتے ہوئے نظر آئیں کہ 'رک جاؤ ورنہ میں تمہیں ماروں گی۔'